Ka Ministry of Education, jong ka sorkar kmie shi bynta na ka thong jong ka National Education Policy (NEP) 2020 kaba la pynmih ïa ka hukum ban don ka prokram kyrpang ïa ki khynnah skul ha baroh ka Ri India kaba tip kum ka ‘Summer Camp’ ha ka phang kaba ong ‘Eco-Club for Mission Life’ ka ban sdang naduh 5th-12th tarik u Jylliew, 2024.
Ka ophis treikam u State Project Director, SEMAM-SSA Shillong mynta ka sngi 5 tarik u Jylliew kala leh ïa kane ka prokram da ka jingshim bynta ki skul kiba don hapoh ka West Jaiñtia Hills District katkum katei ka phang bad kala long ka jingmyntoi ïa ki khynnah skul.
Kane ka ‘Summer Camp’ kan long haduh 7 sngi lynter ha kaba ki nonghikai ki don ka bynta kaba khraw ban pynrung ha ki jingmut jingpyrkhat jong ki khynnah ban long ki lawei haka shnong ka thaw, ka akor ka burom bad ban long kiba tip ban sumar ïa ka mei mariang kaba pyndap ïa u khun bynriew.
Ha kane ka sngi ki nonghikai kila ai jingbatai ïa ki khynnah skul kynthup ïa ka Adopt Healthy Lifestyle, Adopt Sustainable Food System, Reduce E-Waste, Reduce Waste, Save Energy, Save Water bad ka Say No to Single use of Plastic.
Nalor kane ka prokram la ai jinghikai ban pynjanai shuh shuh ïa ki khynnah skul halor ka rukom treikam jong ka thong ‘Eco-Club For Mission Life’. Na ka liang ka ophis u State Project Director, SEMAM-SSA kala pynsngew sha baroh ki skul ban shna ne sdang noh ïa ka Eco Club ha kaba ki dkhot kin kynthup lang naduh ki khynnah skul, ki nonghikai bad ki kmie ki kpa.
