Ka Pariksha Pe Charcha kadei ka prokram kyrpang jong ka Sorkar India lyngba ka Ministry of Education, ha kaba u Prime Minister ka Ri, u Narendra Modi u iakren markhmat bad ki khynnah skul, da kaba sneng ba kraw bad aibuit ai mynsien ia ki khynnah shaphang kumno ban long kiba jop ha ka jingiaidlynti jong ka jingim bad ruh ban poi sha ka thong ha ka pule ka puthi.
Kumba long ha kylleng ki District ka Ri India ha kane ka 6 tarik Rymphang 2026, ki khynnah skul ha West Jaintia Hills District ruh ki la iashim bynta ban sakhi ia ka 9th Edition Pariksha Pe Charcha 2026 ba la pynlong ha Dorbar Hall ka Loompyrdi Iongpiah, da ka jingiatreilang hapdeng ka District Mission Coordinator, SSA bad ka District School Education Officer, West Jaintia Hills.
Na ka liang ki khynnah skul hadien ba la kut ka jingkren u Prime Minister, ki la iohlad pat ban iashimbynta ban ai jingkren halor ka jingshem bad ka jingmyntoi ba ki ioh na kane ka prokram bad ki da pynpaw ruh ka jingsngewkmen haba ki iohlad ban sakhi ia kane ka prokram kaba long shisha ka prokram kaba ai jingmyntoi ia ki khamtam ha ka jingiadei bad ka pule puthi bad ruh ha kaban long ki khynnah kiba lah ban ialeh pyrshah ia ki jingeh kiba long ki mawjynhut ha ka jingiaidlynti ka jingim jongki.
Khatduh shwa ban pynkut ia kane ka prokram, ka Ioomiatmon Dkhar, Teacher Seinraij Higher Secondary School, Jowai ka la pashat ki kyntien ai mynsien ia ki khynnah skul.
