Ka ophis jong ka Dorbar Shnong Namdong-B, West Jaiñtia Hills hapoh ka jingïalam u Waheh Shnong ma D. S.War lem bad ki nongkitkam shnong mynta ka sngi kila ïamih paidbah ban pynlong ïa ka jingpynkhuid shnong ha baroh ki dong ki shnat, ki lynti ki syngkeiñ kaba la sdang naduh ka por 9 waje mynstep.
Hashwa ban pynlong ïa ka jingpynkhuid Shnong la don ka jingïalang ba lyngkot bad na ka liang u Waheh Shnong bad ki nongïalam Shnong kiba pynshai shaphang ka rukom pynkhuid shnong bad kila buh ruh ka jingkyntu ïa ki nongshong shnong ban long kiba lehkhuid bad ym bit ban bret pathar ïa ki ñiut ki ñier kat shaba lap.
La pyntip nangne shakhmat ka Dorbar Shnong kala rai baroh ki longïing, ki dukan kiba don harud surok bah kim bit shuh ban pynhap shyiap ne ki maw khamtam haki jaka ïaid kjat (footpath) bad ki dei ban long kiba kylluid haka leit ka wan jong ki paidbah khamtam ïa ki khynnah skul.
Ka Dorbar shnong kala kyntu jur ïa ki nongshnong ba kin long kiba ïatreilang ryngkat ryngkat bad ka shnong, kumjuh ruh ïa ki para marjan shnong kiba wan ïew shaphong ka shnong ba kin long kiba lehkhuid.