Kum shi bynta ban ai lad ïa ki samla pule ban pyni ïa ki sap ki phong bad ka jingwad bniah jong ki ha ka thoh ka tar, ban kyntiew ïa ka sap ha ka jingnang jingtip halor ka technology, ka ophis u District School Education Officer (DSEO), jong ka East Jaintia Hills District, ka la pynlong ïa ka District Level Science Seminar ha kane ka 28 tarik Nailur, ha Jaintia Eastern College, Khliehriat halor ka phang “The Quantum Age Begins: Potentials and Challenges.”
Ha kane ka seminar la sakhi ïa ka jingshim bynta da ki samla pule na ki 8 tylli ki skul bapher bapher jong ka District kiba la pyni ïa ka sap ha ka jingpynkhreh, jingstad bad ka jingnang jingtip jong ki lyngba ka power-point presentation. Ki samla pule ki la batai shai halor ki lad jingmyntoi bad ki jingeh kiba don ha ka Quantum Age kum ka jingkiew ha ka (machine learning), ka jingshong shngaiñ ha ka jingïakren lyngba ka technology, ka roi ka san ha ka ïohkam ïohjam bad ka khaii ka pateng, bad kiwei pat. Ki jingeh pat ki kynthup ka jingeh ha ka technical, ka jingma ha ka jingïada jingtip bad kiwei de.
Hadien kawei pa kawei ka jingpynshai, ki nonghikai ki la ïakren bad ïamir jingmut bad ki samla halor ki bynta ba ki la wanrah ha ki presentation jong ki.
Hadien ba la wai ka seminar kaba la neh shi sngi, la sam ruh ïa ki Cash Award bad Certificate sha ki nongjop bad ki skul kiba la shim bynta ha ka jingïakop.
U Peter Arsalon Pyngrope na Khliehriat Higher Secondary School, Khliehriat u la ioh ïa ka nam lahduh (first prize). U Beneiah Gadiel Sutnga na Little Star Secondary School, Ladrymbai u la ioh ïa ka nam ba-ar (second prize) katba ka samla Bornah Rabha na Rymbai Government Secondary School, Rymbai ka la ioh ïa ka nam ba-lai (third prize).
La sam ruh ïa ki khusnam bad ka certificate sha kiwei ki skul kiba la shim bynta kum ka Sacred Heart Secondary School, Byndihati, Little Flower Secondary School, Khliehriat, Sutnga RMSA Secondary School, Khliehriat Presbyterian Higher Secondary School, Khliehriat bad Little Star Academy Secondary School, Khliehriat.
