Kum shi bynta na ka jingrakhe ia ka jingdap 54 snem ka jingioh jylla bapura jong ka Jylla Meghalaya Day ne ka Meghalaya Day mynta ka sngi ki bor pyniaid District jong ka East Jaintia Hills ruh kila iashim bynta lang bad ka Jylla baroh kawei ban rakhe burom ia kane ka sngi.
Ia ka jingialang la pynlong ha Conference Hall jong ka ophis u Deputy Commissioner ka East Jaintia Hills kaba la pyniaid da kane hi ka ophis.
Ha kane ka prokram la la iadon lang u Addl. DC bah C.P. Mawkon, MCS, Addl. DC S.R. Marak, MCS, Assistant Commissioner, Smt. E.A Sangma, MCS, Assistant Commissioner, Smt. E.D Shira, MCS, Research Officer, Planning Branch, bah Shngainlang Marwein ryngkat ki ophisar bad ki nongtrei jong ki tnad sorkar bapher bapher, kumjuh kiba shah khot sngewbha ryngkat bad ki khynnah skul.
Haba ai jingkren ha kane ka jingialang, u Additional Deputy Commissioner, East Jaintia Hills District u bah C.P. Mawkon, MCS u la pynpaw ba ka Meghalaya Day kam dei tang ka sngi lehkmen hynrei ka dei ka sngi ban pynkynmaw ia ka jingiakhun bad ka jingaiti kaba don ha ka histori kaba la pynlong ia ka jylla ban thaw ia ka jylla. U la pynkynmaw ba ha ka 21 tarik Kyllalyngkot 1972, la ai ia ka jylla Meghalaya kaba pura hapoh ka jingialam jong ka Myntri Rangbahduh ka ri ha kata ka por, ka Smti. Indira Gandhi hadien ki snem jong ka jingïakhih bad ki jingkyrpad ba la bteng da ki nongïalam ba don jingthmu jong ka jingïakhih ban ïoh ïa ka Jylla jong ka Meghalaya.
U Mawkon u la pynpaw ia ki jingnoh synniang jong ki nongialam kiba la leit noh kiba ka jingaiti bad jingminot jong ki ka la buh ia ka nongrim na ka bynta ka jingkiew kaba ngi ioh mynta. U la kdew ba ka jylla ka la ïoh ïa ki jingjop kiba kongsan ha kine ki phew snem ha ki bynta kum ka jingpynïasoh surok, ka pule puthi, ka kam ka jam, ki jingtei, ka roi ka par ha ka imlang sahlang bad ka longbriew manbriew bad kiwei kiwei ryngkat bad ka jingpynkiew ïa ka jingbei tyngka jong ka sorkar bad ki riew shimet. U la ong ba kine ki jingjop ki dei ki jingmih na ka jingïaid lynti kaba jngai kaba la shimkhia da ka jylla bad ki paidbah jong ka.
Kiwei de kiba la ai jingkren ki kynthup ia u S.R. Marak, MCS, ka E.D. Shira, MCS bad kiwei.
La pynshit pynsyaid ia kane ka prokram da ka jingrwai na ki kynhun jong ki khynnah skul jong ka Khliehriat Hr. Secondary School, bud sa ka shad tynrai da ki khynnah skul jong ka Khliehriat Presbyterian Hr. Secondary School, ka jingpyni ia ka jingriewspah jong ka sap ka phong bad ka riti dustur jong ka jylla.
