Shi bynta na ka sngi ba kyrpang jong ki kynthei ha shi tyllup ka pyrthei, na ka liang ka Women’s Welfare Organisation, Seinraij Jowai hynnin ka sngi 8 tarik u Lber ka la rakhe ïa ka International Women’s Day ha ïing Dorbar ka Seiñraij Jowai ha ryngkat ka jingdonlang naduh ki longkmie bad ki khun samla kynthei.
La wan ban pynsyaid ia kane ka jingrakhe da ka jingiadonlang u Dr. D.I.Kjam, AH & Veterinary Officer, West Jaiñtia Hills, ka Dr. Lema Challam, Additional Director, MCH and FW, Directorate of Health Services, ma O.R. Shallam kiba long ki nongshah khot sngewbha sha kane ka sngi kyrpang.
Ïa ka jingïalang la pynïaid da ka kong Hima Lakiang, Chairperson WWO-Seinraij. Ka phang pdeng jong kane ka jingrakhe ka long “Gender Equality Today For a Sustainable Tomorrow”.
Na ka liang u Dr. D.I. Kjam ula pynsngew katkum ka riti dustur jong u khun Khasi Khara, ka kynthei ka long kaba la dep pynkup bor ha ka ïa ka jinglong ba kyrpang kaba long ka nongpeit ïa ka ïing ka sem bad ka nongshim ïa ka jait ka kynja.
Ka Dr. Leema Challam, Additional Director, MCH and FW, Directorate of Health Services kala ai ka jingkyntu ïa ki longkmie ba kin kheiñ kor ïa ka jingai ba kordor ka mariang ha kum kane ka por jong ka juk stad mynta.
Ha ka juh ka por ka kyntu ïa ki longkmie shaphang ka jingdonkam jong ka jingkoit jingkhiah ha ka jingim, da kaba kyntu jur ban sumar bha ïa ka met ka phah naduh ka bam ka dih, ka kha ka pun bad kiwei de.
Ha kane ka sngi la pynphuh pynphieng da ki jingrwai bad ki jingshad ba la shim bynta da ki khun samla bad ki longkmie na ki dong bapher bapher.
