Hadien ba la dep ka niam ka rukom pynkyntang Lyngdohniam ha ka nohphaisngi la pynlong ia ka jingiaid proseshon Iukharist kaba la sdang na Madan Skul Marianhill Higher Secondary School bad iaid lyngba ia ka Moosalyngkat, Iawmusiang, Mission Compound, Iongpiah, Tpep-pale, Wahnangbah bad wanphai biang sha Madan Skul Marianhill Higher Secondary School.
Ka jingiaid proseshon kaba iphuh iphieng bad kaba shongkun shongblei da ki jingduwai na ka bynta ki jingthmu bapher bapher bad da ki jingruwai kiba shoh mynsiem. Ha kane ka jingiaid proseshon la lamkhmat da ka Diengphna bud ka Band na ka Archdiocese Shillong, nangta ki paidriewngeit jong ki Parish bapher bapher jog ka Jowai Diocese, ki riewngewit na ka Diocese Nongstoin, Archdiocese Shillong, ki khynnah riamlieh, ka Sakrament bakhuid tam ka Duwan bad ki paidriewngeit ka Parish Jowai.
Ha shwa ban pynkut da ka jingkyrkhu da ka Sakrament bakhuid tam, la ioh ia ka jingkren bad ka sneng ka kraw kaba sngewtynnat halor ka Iukharist bakhuid da u Lyngdoh Sohblei Rev. Richard Majaw. La pynkut ia kane ka sngi da ka jingpynhiar ia ka Lama rakhe Jubilee 2025 bad kyntiew pat ia ka Lama plie ia ka jingrakhe Centenary jong ka Parish Jowai.
