Mynta ka sngi u Lat jong ka Jylla u Phagu Chauhan ula iashim bynta lang ha ka ban sam ia ki khusnam sha ki nongjop jong ka Half Marathon kaba lai kaba la pynlong da ka Assam Rifles ha Headquarters jong ka Directorate General Assam Rifles kaba don ha Laitkor, Shillong.
Kane ka jingpynlong ia ka Marathon ka long ban wanrah ia ka mynsiem jong ka jingiatylli hapdeng ki nongshong shnong jong ka ri India bad ka long ruh shi bynta na ka “Fit India Movement” kaba la shah ban iashim bynta ia baroh kiba la kot 18 snem ka rta shaneng na ka bynta ki kynthei bad shynrang.
Ha kane ka jingiamareh (Marathon) kaba 21 Km, kila don haduh 747 ngut kiba la wan ban iashim bynta ha kaba la bhah ha ki kynhun bapher bapher. Ki don 290 ngut kiba don ha ka rta kaba 18 haduh 30 snem, 199 ngut ha ka rta kaba 30 haduh 40 snem, 123 ngut ha ka rta kaba 40 haduh 50 snem bad 135 ngut kiba don 50 snem shaneng ka rta.
Ha kane ka jingiamareh la wan ban iashim bynta da ki shipai bad ki khun ki kti kiba kynthup na ki shipai Assam Rifles, 101 Area, Eastern Air Command, CRPF, CISF, SSB bad ka Meghalaya Police. La bynta ia kane ka Marathon ha ki ar bynta kata ha ka 21 Km bad ka 10 Km.
Ki nongjop hapoh ka rta ba 30 snem ki long u Emphius Nongrum ha ka jingmareh kaba 21 Km bad ka Bandasharai Marwein na ka liang ki kynthei. Ha ka jingjngai kaba 10 km u Iohborlang Nongspung ula jop na ka liang ki shynrang katba ka Marqueenless Ramsiej ka nongjop na ka liang ki kynthei.
