U Myntri Rangbah ka jylla, Conrad K. Sangma hynne ka sngi ka 3 tarik Ïaiong 2025, u la leit ban ïashim bynta ha ka sngi ba pynkut (closing ceremony) ia ka jingrakhe dap 50 snem (Golden Jubilee) ka All Meghalaya Karbi Association (AMKA) ha Umwang, Ri Bhoi District.
Ha kane ka sngi ba kyrpang, la wan ban don ryngkat ruh da u Bah Mayral Born Syiem MLA Nongpoh Constituency, Bah Charles Marngar MLA Mawhati Constituency, Kong Rona Khymdeit MDC Nongpoh Constituency, Bah Isynei Hinge MDC Umroi Constituency, ki dkhot ka AMKA, ki Nongïalam Shnong bad kiwei kiwei.
Haba ai jingkren ha kane ka sngi, u Myntri Rangbah u la ai Khublei ia ka AMKA kaba la poi jngai ha ka jingiaid lynti kum ka kynhun. Khlem da wan thylli ha ka sngi na pynkut ia kane ka Jubilee, u Myntri Rangbah u la ïaroh ia ka jingkiew bad ka jingmih ki snar ïalehkai na kane ka Distrik ha kaba u la kular ruh ban kyntiew shuh shuh ia ka kam ïalehkai da kaba pynioh biang ia ki madan phlang kiba thung hi, madan plastic (Artificial turf), ki hall ialehkai, stadium, Convention Centre bad pyntikna ruh ba baroh ka jingpynlut na ka bynta kane, kan kot haduh 20 klur tyngka tam.
Khlem da klet ruh ia u Nongïalam ba khraw ka thaiñ, u Conrad u la ai Khublei ia u Dr. D.D. Lapang uba la long u radbah ka jylla “U Dr. Lapang u la long kum u atiar ban thawdur ia kane ka Distrik, ki kam ba u la leh kum u Myntri Rangbah ki long ki matti ban sah junom, u la long ruh uwei na ki dkhot ba sdang ia ka AMKA. U la noh synniang shibun bad u dei uta u briew ba ngin sngewnguh la ka long na ka bynta ka Jylla, na ka bynta ka AMKA ne na ka bynta ki briew jong ka Ri Bhoi District” ong u Myntri Rangbah.
Ban pynkut ia kane ka program, u MR u la ïakynduh ia ki Nongïalam ka AMKA bad kular ruh ban noh da ka song Pisa kaba 55 lak sha ka AMKA.
