Mynta ka sngi 5 u Nailar, ki dkhot ka Earth-Tree bad ka Jaintia Hills Autonomous District Council (JHADC) jong ka tnat Forest ki la ia soi ia ka Memorandum of Understanding (MoU), haka ba iadei bad ka project thung dieng ha ki jaka ne ki lum ki them kiba syllen kiba don ha ri Lum Jaiñtia, ki jaka ba dang hap hapoh ka jingpeit jong ka District Council.
Ia kane ka program la pyniaid da u ma HH Mohrmen Consultant Earth-Tree, ha kaba la ioh ruh ka jingkren na u Director Earth-Tree u Sunny Donkupar Mawiong, uba la ong, hadien ba la iohi ia ka jingsah shrah ne syllen jong ki lum ki wah, kaba la ktah ia ka mariang ka ban ktah ia ka koit ka khiah jong ki pateng ki ban dangwan, kumta lyngba kane ka project thung dieng kan wan rah ka jingiarap shibun, khamtam ha kaba iadei bad ka mariang.
Na ka liang u CFO ka JHADC ma F.W. Blah, u la ong ba kumba long mynta ka jingdon jong ki dieng ki seij ka la duna bha, hynrei lyngba kane ka project kaba la buh ia ka por haduh 40 snem ban heh ban san kine ki dieng.
Shuh shuh u la ong ruh ba kumba long mynta ki briew ki ioh ban pyndonkam ia ki dieng kiba dei kiba dang lung ban shna iing shna sem, ki bymlah ban neh slem ym kum ki dieng kiba la heh la san kiba lah ban neh slem.
U la ai khublei ruh ia ka Executive Committee jong ka JHADC kaba la peit jngai na ka bynta ka jingpynneh pynsah ia ka mariang kaba la pdiang ia kane ka project thung dieng ha ki jaka jong ka Council kiba don ha kylleng ka Ri Lum Jaintia. Na ka liang jong u ma Blah u la kyntu ruh ba dei ban thung ym tang ia ki dieng hynrei ia ki diengsoh ruh kumjuh kiba lah ban ai jingmyntoi.
La ioh ruh ka jingkren na u Dr. S N Gosawami, Chief Operating Officer Earth-Tree, u la ong kane ka dei kawei na ki project kiba don ka jingdei bad ki sawdong sawkun jong ka mariang ha Ri Lum Jaintia.
