U MDC ka 18-Jowai North u ma Awhai Andrew Shullai haba wanrah ïa ka jingïatai (Motion) haka Dorbar Mang Tyngka jong ka Jaiñtia Hills Autonomous District Council (JHADC) Jowai kaba la long mynta ka sngi halor ka jingai NOC ka JHADC ïa ka M/s Shree Cement Limited kaba don ha shnong Daistong, East Jaiñtia Hills District.
Na ka liang u ma Andrew ula pynsngew da kaba buh jyngkylli balei ka JHADC ka dang bteng ban ai NOC sha ki bar jylla kiba wan ban seng ïa ki Karkhana Dewbilat kaba la bteng naduh u snem 2000 bad mynta kumba la ïoh jingtip kila don haduh 8 tylli kynthup ïa kane ka karkhana ba wan seng thymmai bala ai NOC da ka Council.
Ula pynsngew ba ka jingwan ki Karkhana kala ktah shi katdei eh ïa ka mariang hapoh ki jaka ki puta jong ka Council bad ka jingshah ktah kumjuh ïa ki nongshong shnong nalor ka jingbym ïoh kam kum ki trai ri trai muluk hapoh kitei ki Karkhana.
Ka M/s Shree Cement Limited ka dei kawei na ki Karkhana Dewbilat kaba heh duh bad kaba pynmih haduh 1 million ton haka shisnem ïa ka dewbilat bad kane kan ktah naduh ka bording bad ka jingjakhlia jong ka mariang, nalor kata ula ong ba ki Karkhana kila pynduh ïa ka kamai kajih jong ki trai jylla bad kitei ki Karkhana kila thied hi ïala ki jong ki trok ban kit ban bah.
Kiba bun na ki MDC na ka liang pyrshah kiba ai ka jingkyrshan ïa kane ka mat jingïatai kaba lah ban ktah ïa ka khyndew ka shyiap bad ka lawei jong ka jaitbynriew ha ki sngi ban wan. Kila buh jingkylli halor kano ka nongrim ba ka EC kala ai NOC ïa katei ka kompani.
Haba pynshai ïa kane da u CEM ka JHADC u ma Thombor Shiwat ula ong ka jingai NOC sha ka M/s Shree Cement Limited ka long ha ka nongrim ba ka Council kala bud ïa kane ka juh ka jait jingpang kaba la leh naduh ki por mynshwa jong ka snem 2000.
Hashwa ban ai ïaka NOC kala don ka jingpyrshang jong ka EC ban wad ïa ki lad ki lynti halor kumno ban khanglad ïa katei ka Company ban ïoh NOC, hynrei katba dang pyrshang la wan pynban kiba kyrshan ban dawa pynïoh NOC lyngba ki nongïalam ka shnong Diastong, ki nongïalam jong ka Elaka Nongkhlieh bad kumjuh na ki bor jong ka sorkar jylla, ha ryngkat ki kam pynroi kiba kular da ka company ïa ka shnong.
Kum ka EC kam banse ban ai ïa kane ka NOC ha ryngkat ki kyndon aiñ ba biang (Term & Condition) na ka bynta ka jingïoh myntoi ka Coumcil, hynrei haba ïakhun ïa kane la pynsngew sha ka Council ym donkam kyndon shuh ïa ki namar ïa ka bhah jong ka Minor bad Major na ki marpoh khyndew ka Council kala ïoh lypa na ka sorkar.
U ma Thombor ula pyntip na ka liang ka EC kala thaw ïa kawei ka kyndon aiñ ban phah sha sorkar jylla bad kumjuh sha u Lat ïa kaba la tip kum ka “The Jaiñtia Hills Autonomous District Council (Trading by Non-Tribal) (Amendment) Rules, 2023” kaba lah ban ïarap ïa ka Council ban pynmih pisa.
Haba pynkut ïa ka jingpynshai ula kyntu ïa ka Dorbar da kaba ong “ngi la bakla lypa naduh kaba sdang, to ngin pdiang ïa ka da kaba bakla”.
Shuh shuh ula pyntip wat ïa ki Monitoring Gate kiba thmu ban buh ha ki shnong bapher bapher na ka bynta ban ïoh lum khajna, hynrei kiba bun ki shnong kim shah ïa ka Council ban buh ïa ki, da kaba pyni daw ba kin dei ban wan tuklar shapoh ki shnong ki thaw. Hadien ka jingïakren bad ki jingpynshai na ka liang u ma A.A. Shullai ula la rai ban weng noh ïa katei ka Motion.
