U Myntri ba peit ia ka tnad Social Welfare u Bah Paul Lyngdoh, haba kren bad ki lad pathai khubor ha ka 9 tarik Jymmang 2025 u la ong ka tnat Social Welfare ka la iateh bad ka wei ka kynhun ialehkai Football na ka jylla ka Shillong Lajong ban ai jinghikai bad ruh ban khring ia ki samla ba kin sngewthuh ia ka jingma kiba mih na u drok.
U la iathuh ba ka tnat ka don ia ka jingiatreilang bad ka Faith based Institution nangta bad ka Meghalaya Drug User Forum kiba ia trei lang bad u Mission Director ka DREAM Mission ka sorkar jylla, ka iatreilang ruh bad ki Shnong ki thaw.
U la ong ka tnat ka shim khia bha ha kaba ka ai ka jinghikai ia kine kiba ngop ha u drok kumno ban ieng ha la ki jong ki kjat hadien ba ki la lait na kane ka jingdih ba sniew.
U la iathuh ruh ba shen ka sorkar kan sa sdang ia ka survey ha baroh ka wei ka jylla halor ka jingdon kiba pyndonkam ia u drok, bad ruh ban tip ia ki jaka kiba ka jingpyndonkam ia u drok ka kham bun.
U Bah Lyngdoh u la bynrap da kaba ong ba ka sorkar ka la shimkhia shikatdei ban tehlakam bad ban pynduh syndon ïa ka jingdon ki drok bad ka jingkhaïi drok napoh ka jylla Meghalaya.
Ka sorkar ka shim ia ka sienjam ba kongsan kata ban sdang ban ym ailad ïa ki samla pule bad ki khynnah rit ban ngop ha u drok ne kino kino ki jingdih pynbuaid.
Ka DREAM Mission ka la ïatreilang bad ka Sanker Centre for Neurology and Mental Health bad mynta ka la pynïaid lang ïa kawei ka course kaba la dep sdang da ka Sanker, kaba ai ïa ka jinghikai ïa ki nonghikai skul ha ka liang ka (counselling) ïa ki khynnah skul naduh klas 2 haduh klas 5.
U bah Paul Lyngdoh u la pynpaw ka jingsngewkmen ban pyntip ba ka bai lut jong kane ka course baroh ka long T.10,000/- bad ka sorkar kan siew 50% naka bynta kane ka bai course. Kane ka long kawei na ki sienjam ba kongsan ban pyni – ka jingïarap pisa na ka bynta ki nonghikai kiba kin long kum ki counselor ban ïarap ban tehlakam ïa kane ka jingeh. Namar ba ym lah ban lum lang ïa baroh ki khynnah skul ha kawei ka jaka, ka sorkar kan pynïaid da ka lynti ba yn hikai ïa ki nonghikai ha ki skul shimet-shimet ban long counsellors ha la ki jong ki skul.