Ka Rotary Club Jowai (RCJ) kawei na ki seng treimon sngewbha hapoh ka imlang sahlang mynta ka sngi 10 tarik u Nohprah kala pynlong ïa ka jingïathir jingmut na ka bynta ki samla pule jong ka Kiang Nangbah Govt. College, Jowai bad ka Thomas Jones Synod College, Jowai halor ka phang kaba ong “Ka Daw Bah Daw San ïong i hiardor ka Jaitbru Khasi-Jaiñtia ha kani ka juk wa katni’ ha KNG College Auditorium.
Ha kane ka prokram la wan ban ïashim bynta lang da ki Waheh Shnong, ki samla purae bad kiwei de kiba la shah khot sngewbha ha ryngkat ka Professor Streamlet Dkhar, Former Dean, School of Humanities NEHU & President Indian Council of Social Welfare, Meghalaya State Branch kum ka Guest Speaker bad ka Bakhianmon Rynjah, Associate Professor Sankardev College Shillong.
La sdang ïa kane ka prokram da ka jingrwai ïa ka National Anthem bad bud sa ka jingïalang ba lyngkot ba la pynïaid da u Rtn. Samehi Laloo, President Rotary Club Jowai, la ïoh ruh ka jingkren da u Rtn. J.M. Pohsngap (PHF) Past President RC-Jowai, ki kyntien ai jingmut na u Rtn. S.K. Lato, Director Community Service, RC-Jowai katba u Rtn. Ruevene Nongtdu (RFSM) ula pule ïa ka jingïathuh khana lyngkot ka Professor Streamlet Dkhar kum kawei na ki longkmie ka jingbynriew Hynñiewtrep Hynñiewskum kaba la wanrah ïa ka nam ka burom jong ka jaitbynriew ha ka liang ka thoh jingrwai Poitri bad ki jingïathuh khana.
Na ka liang ki samla pule ba mihkhmat na ka Kiang Nangbah Govt. College bad na ka Thomas Jones Synod College kila ïaleh ban pynsngew hala ki jong ki buid ki budia kiba ïadei bad kane ka phang kaba kynthup naduh ka jinghiar dor ka jinglong jingim ha ki ïing ki sem, ka imlang ka sahlang, ka roi ka par, ka jingnang jingstad bad kiwei de.
La ïoh ruh ka jingbatai halor kane ka nongrim na ka Renda M. Khonglah, Asst. Professor Khasi Department, Thomas Jone Synod College, Jowai, u Rimiki Lada Nanghuloo, Asst. Professor Physic Department, Kiang Nangbah Govt. College Jowai, ka Bakhianmon Rynjah Rynjah, Associate Professor Sankardev College Shillong bad kumjuh na ka Professor Streamlet Dkhar, Guest Speaker jong kane ka prokram.
Katba na ka liang ki nongbishar ha kane ka prokram ki kynthup ïa u ma Requoma Rq. Laloo, Headmaster Tep Kyndait School Tuber, u L. Lyngdoh, Jt. Director DSEL, West Jaiñtia Hills bad u R. Lamar, Retired Principal Williamson Sangma Govt. College, Tura.
Ïa ka nam Best Speaker la ïoh rah da u Osmond Suchiang ka Kiang Nangbah Govt. College Jowai uba la ïoh khur 242 point bud sa u Kynjailang Salahe, Kiang Nangbah Govt. College Jowai Kiang uba la ïoh 190 point bad nangta sa u Quickly Pala ka Thomas Jones Synod College, Jowai uba la ïoh 188 point.