Ka Sheikh Hasina ka la iehnoh kyndit kyndit ia ka shuki kum ka Prime Minister jong ka ri Bangladesh mynta ka sngi ka 5 tarik Nailar namar ka jingkhluit kaba dang ïaid mynta ha katei ka ri.
La ioh ruh ia ka khubor ba katei ka nongïalam ka la phet na katei ka ri bad wan rieh noh ha India ha ka por kumba 5:36 janmiet ha Hindon AIR Base ha Uttar Pradesh.
Ka jingiakynad ka dang jur bha mynta ha katei ka ri, bad la ong ba ki paidbah kiba pyrshah Sorkar (anti government) ki la dawa la katto katne ba ka Hasina kadei ban hiar mardor na ka shuki. Kumba 300 ngut ki la iap na ka katei ka jingiakynad.
Kiwei ki lad khubor, ki iathuh ba u paidbhur, ula leit rung ruh ha ka ïing sah jong ka Hasina, mynta ka sngi ha Ganabhanan, kaba ha Dhaka, ha kaba ki la rung bad pynjot thiaw ia ki jingdon jingem jong katei ka ïing sah jong ka Hasina.
Katkum ka jingkren jong u heh shipai ka Bangladesh, u Waker-Uz-Zaman u la ong “Ngin wad ia kiba don kti halor katei ka jingshah pyniap bad ngin pynshitom”. U la iathuh ruh da ki hajar kiba la wan ha ka jaka sah jong ka Myntri Rangbah bad pynjot ia ki kamra bad ki tiar jong ki.