Haduh 46 ngut ki dkhot jong ka Hynñiewtrep Achik National Movement (HANM) na East Jaintia Hills kiba kynthup ia ki nongkitkam bad ki dkhot Committee kila ieh noh kam shi sien ieh hynne ka sngi (3.6.2022) bad kila shim ruh ia ka rai ban mih noh syndon na ka seng.
Katkum ka shithi kaba la phah sha u President Rangbah, Central Body jong ka HANM u bah Lamphrang Kharbani, kine ki nongialam bad ki dkhot kiba la soi ia ka shithi iehnoh kam jong ki, kila pynpaw ba kila shim ia rai da ka jingtip briew tip Blei bad kim don satia kano kano ka jingiapher jingmut bad ka seng.
Kumta na ka liang kitei ki dkhot ba la iehnoh kam kila kitbok kitrwiang ia ka HANM ba kan nang iaid shaphrang ha ki kam shakri paidbah jong ka.
Ki dkhot bad nongkitkam kiba la iehnoh kam na ka HANM East Jaintia Hills ki don 13 ngut. Kine ki kynthup ia u President u Comingsoon Dkhar, u Organizing Secretary u Syrdep Ryngkhlem, u Asstt. Sport Secretary u Char Phawa, u Asstt. General Secretary u R. Dkhar lem bad 9 ngut ki dkhot jong ka.
Na ka HANM Easter Region kiba la iehnoh kam ruh ki don 13 ngut. Kine ki kynthup ia u President u Emlang Dkhar, Sport Secretary u Pyniengki Rymbai lem bad 11 ngut ki dkhot.
Na ka HANM Musniang Rim Unit kiba la iehnohkam ki don 20 ngut. Kine ki kynthup ia u President u Pynwan Siangshai, u Genl. Secretary u Comehere Siangshai lem bad 18 ngut ki dkhot ka Unit.