Ka Jaiñtia Students’ Union (JSU) Jowai Circle mynta ka sngi 29 tarik u Jymmang haka por dang step phyrngap kumba 1:15 baje eiei kila ïoh bat ïa 8 ngut ki nong Bangladesh kiba thmu ban wan rung be-aiñ shapoh ka jylla Meghalaya na ki ar tylli ki kali (Tourist) Wagon R.
Na kine ki kali kawei kaba don ïa u Registration no ML05 AE 4857 bad kawei ML05 AB 3544 la ïoh bat da ki dkhot ka seng ha ki bynta jong ka Demthring (check Point), West Jaiñtia Hills District.
Hadien ka jingtohkit ïa kitei ki briew bar jylla kiba kynthup saw ngut ki kynthei bad 4 ngut ki shynrang kim don satia ïa ki kot ki sla kiba biang ban pynshisha ïalade, kitei ki bar jylla kila ïathuh ruh bala don sa kawei ka kali Alto kaba la phet rieh na kane ka jaka ba pynlong ka jingkhynra bar jylla.
Na ka liang ka seng kala leit ban ujor noh da ka ejahar ha Jowai Police Station khnang ba kin ïoh leh ïa kaba donkam.