U Dr. Sankey Shangpung uba dei u MDC jong ka 29- Bataw-Lakadong Constituency bad uba la ju long teng u Chairman jong ka Samoi kaba dep hapoh ka JHADC ula ioh biang ban bat ia kane ka shuki sa ha kane ka kynti hadien ba ula pynliem ia u kyrtong ba ia aireng ia kane ka shuki kata u ma Rikut Parein, MDC ka 13-Saphai-Sahsniang Constituency.
Ha ka jingjied Chairman kaba la long mynta ka sngi hapoh ka ïing Dorbar jong ka JHADC la pynlong da ka jingiathep vote da ki Secret Ballot, ha kaba la wan ban iashim bynta da baroh 29 ngut ki MDC ka JHADC.
Ha kane ka jingiathep vote u Dr. Sankey ula ioh 20 vote, u ma Rikut Parein ula ioh 6 vote bad 3 tylli ki vote ki leit sha u NOTA.
Ia kane ka jingjied Chairman la pyniaid da u Deputy Commissioner ka West Jaintia Hills District u A.K. Singh, IAS.
Hadien ka jingpynbna ia ka Result, ki MDC kila iashim bynta ban ai khublei ia u Dr. Sankey kum u Chairman ba thymmai. Baroh ki nongkren ba kynthup ia kiba don ha ka liang synshar bad kiba na ka liang pyrshah ki pynpaw ba ki don ka jingkyrshaniah ha u Dr. Sankey ba un ialam ia ka ïing ha ka lynti kaba dei bad ka bym noh shiliang, khnang ba kin ioh ia ka lad ban iatai bad iamir jingmut na ka bynta ka jingmyntoi jong ka jaitbynriew.
