Ka samla Dorothy Roy Tariang kala ïoh ïaka nam Gold Medal da kaba wan hakhmat duh ha ka Master of Business Admistration (MBA) jong ka Assam Don Bosco University bad kala ïoh haduh 9.29 na ka 10.0 haka Cumulative Grade Point Average (CGPA).
Ka samla Dorothy Roy Tariang ka dei ka khun jong ka Dr. (Mrs) Iwbih Nylla Tariang, Senior Veterinary Officer bad u kpa jong ka u dei u nongthoh khubor (Journalist) u Dr. Anirban Roy, kiba shong basah ha Mynthong Jowai, ka Dorothy Roy Tariang kala pyndep ïa kane la jingpule bniah (Specialization) haka Human Resource Management.
Kane ka dei ka sien kaba nyngkong ïa kane ka samla napoh ka jylla ban poi sha kane ka kyrdan ba hakhlieh haka MBA programme jong ka Assam Don Bosco University. Ïa ka Dorothy Roy Tariang la ai khusnam Gold Medal haka ‘12th Convocation’ jong ka Assam Don Bosco University kaba la pynlong ha kane ka sngi Saitjaiñ ha Tapesia Campus ha Guwahati.
Halor kane ka jingjop ka Dorothy ka don ka jingthrang ban trei shitom na ka bynta ban pynkiew ïa ka jylla ha ka roi ka par. Hashwa ban kan joint ïa kane ka MBA programme jong ka Assam Don Bosco University kala pyndep ïa ka Graduation ha ka Subject English Literature na ka Amity University.
Ha kane ka sngi pynkup burom la sakhi lang da u Governor ka Assam u Gulab Chand Kataria, u Chancellor of Assam Don Bosco University, Fr. Januarius Sangma, u Vice Chancellor ka Assam Don Bosco University, Fr. (Dr) Jose Palely, nalor kiwei de.
Ïa kane ka nam Gold Medals la pynkup burom sha ki 36 ngut kiba la pyndep hok ha ryngkat ka jingïoh (Highest) ha ka Cumulative Grade Point Average (CGPA) ha manla ki programme ha ki kyrdan pule bapher bapher jong ki.