U Assistant Public Prosecutor u Tushar Chanda haba kren bad ki nongthoh khubor u la pyntip ba u Lokendra Sing Tomar bad u Balbir Ahirwar ki la ioh jamin ha ryngkat bad ki kyndon.
Kum ban shu pynkynmaw u Lokendra Sing Tomar bad u Balbir Ahirwar ki la shah kem ha ki Pulit ka Meghalaya halor ka jingsuba ban buhrieh ia ki tiar sakhi halor ka jingiap u Raja Raghuvanshi.
U Lokendra Sing Tomar u dei u Trai ïing jong ka flat ha indore ha kaba ka sonam ka rieh hadien ba la dep pyniap ia u Raja Raghuvanshi bad u Balbir Ahirwar u dei u Security Guard ba trei ha katei ka flat ha indore.
Shuh shuh u Tushar Chanda u la ong ka jingtohkit ka dang iaid mynta bad lada lap ia ki ba ki donkti u Assistant Public Prosecutor u la iathuh ba un file da ka Petition ban pynduh noh ia ka jamin jong ki baroh 2 ngut kata u Lokendra Sing Tomar bad u Balbir Ahirwar.
Haba iadei bad Silome James na ka liang u Assistant Public Prosecutor u la pyntip ba kin nym ailad ia u Silome James ban ioh jamin namar katkum ka case u suba donkti ban buh rieh ia ki tiar sakhi halor ka jingiap u Raja Raghuvanshi.
Kum ban shu pynkynmaw u Raja Raghuvanshi u la shah pyniap ha Sohra, bad ki Pulit ki la kem noh ia 5ngut kiba suba shah kynnoh ban pyniap ia u Raja Raghuvanshi.
Ki 5 ngut kiba la shah kem ki kynthup ia ka Sonam Raghuvanshi kaba dei ka lok u Raja Raghuvanshi, u Raj Khushwaha, u Vishal Sing Chauhan, Anand Kurmi bad u Akash Rajput.
Ha ka jingtohkit ki pulit ki la kem biang sa 3 ngut kata ia u Silome James, Lokendra Sing Tomar bad u Balbir Ahirwar.
