Ka Ramakrishna Mission Sohra ha kane ka 21 tarik mynta u bnai kala bteng ïa ka kam ai jingïarap sha ki nongshong shnong jong ka Thadmuthlong C Phramer, West Jaiñtia Hills District bad ïa kiwei de ki para majan shnong.
Ha kane ka sngi ka RMS ka ïoh lad ban synñiang da ki nep syiad sha ki 170 ngut ki nongshong shnong bad la ïoh ruh ka jingkren ai khublei ïa ka RMS da u Waheh Shnong ma Yowanphi Lyngdoh uba la pynpaw ka jingsngewkmen ïa kane ka kynhun Ramakrishna Mission kaba la ai jingïarap sha ka shnong kum ka dak ban ai jingkyrshan lem ïa ki para mynsiem.
La ai khublei kyrpang ïa u Secretary ka Ramakrishna Mission ma Manbha Lyngdoh uba la trei shitom na ka por sha ka por ban pynïoh jingïarap sha kiba donkam shisha khamtam ïa kito ki longïing kiba duk ba kyrduh.
Na ka liang u ma Manbha Lyngdoh haba ai jingkren ula pynsngew sha ki paidbah ba kane ka jingwan ai jingïarap kim dei satia ban sngewthuh bakla namar ba kala dei ka por Election bad kane ka jingïarap jong ki kam dei na ka skim MDC ne MLA, hynrei kum ka seng trimon sngewbha ka Ramakrishna Mission kala juh synñiang na ka por sha ka por sha ki nongshong shnong ka jylla.
Ha ka juh ka por la ïoh ruh ka jingkren na ki katto katne ki riew rangbah kiba la ai khublei bad kitbok kitrwiang ïa ka Ramakrishna Mission Sohra ba kan dang lah ban bteng ïa kane ka kam ba bha jong ka sha kiwei de ki shnong.
