La biang lut nadong sha dong ha ka jingpynlong ia ka MG hapoh West Jaintia Hill District: DC
Sa tang ar sngi ia ka 6th Meghalaya Games kaba la thmu ban sdang ha ka 20 haduh 25 tarik u bnai nyngkong, ka jingpynkhreh ia ki jaka ka la dep, la pyntip u Deputy Commissioner u bah BS Sohliya. Mynta ka sngi saitjain 18.01.2025, ki bor district ka WJHD ki la pynlong ia ka jingialang bad ki nongthoh khubor ha ka kamra Conference hall ka ophis u DC, ban ai ia ki jingtip halor ki jingpynbeit ryngtih ia ka jingialehkai Meghalaya Game.
Haba kren sha ki lad pathai khubor, u Deputy Commissioner u la pynpaw ia ki baroh ki jingdonkam ba kyrpang ba la leh ha ka jingpynkhreh ia ki jingialehkai, kynthup ia ka jingialang pynher pyrda kaba la pyndep, ka jingpyni ia ka video theme song bad ka jingpynpaw paidbah ia ka ki jingialehkai Mascot “U Kiang”. leopard u mrad jong ka jylla uba la pynitynnad ha ka riam jong u nongialeh laitluid “U Kiang Nangbah” la pynshong nongrim da u ma Sumer kum shi bynta jong ka jingiakop plie kaba la pynlong da u Deputy Commissioner ka West Jaintia Hills.
U DC u la khot ruh ïa ki nongshong shnong ban ïatreilang bad ki jingpynbeit bad ban ïashim bynta shitrhem ha kane ka jingialehkai, da kaba pynshlur ïa ki ym tang ba kin noh synñiang sha ka jingïaid beit ïaid ryntih jong ki jingïalehkai hynrei ban sakhi ruh ïa ki jingïalehkai bad ban long shi bynta jong ka jingkmen.
U President bah John Kharshiiing, u la iaroh ia ka bor synshar district bad ia ki 15 tylli ki komiti kiba la trei shitom ha ka jingpynkhreh ia ka Meghalaya Games. U la pynksan ïa kawei ka bynta kaba kyrpang jong kane ka jingïalehkai Meghalaya kaba 6, da kaba pyntip ba ka dei ka sien kaba nyngkong ba hynriew ngut ki nongïalehkai para, saw ngut ki kynthei bad 3 ngut ki shynrang, kin ïashim bynta ha ka jingïalehkai para siat suloi). Ia kane ka jingthmu la pynlong hadien ka jingkyrpad jong u Myntri Rangbah ka Jylla u Conrad K Sangma ban kynthup ïa ki para-athlete.
U la pynpaw ruh ïa ka jingkyrmen ba ha ki por ban wan kan don ka jingïashim bynta kaba kham bun jong ki para-athlete, da kaba pynpaw ba ka jylla ka aiti lut ban kyntiew ïa ka jingïadon bynta lang ha ki jingïalehkai. U la ong ruh ba, ha kane ka Meghalaya Games yn sakhi ïa kumba 3500 ngut ki nongïalehkai ki ban ïakhun na ka bynta baroh 1600 tylli ki takma, ba kynthup ïa 400 tylli shaneng ki takma ksiar, 400 tylli shaneng ki takma rupa bad 600 tylli ki takma rupa.
U Superintendent of Police u C Syrti, MPS u la pyntip ba ki bor Pulit ki la pynkhreh pura bad yn sa pyntreikam ha ki jaka ba donkam khnang ban pynthikna ïa ka jingshngaiñ ha ka por ba long ka jingïalehkai ka Meghalaya. U SP u la pynpaw ruh ba la pyndep bad pynmih ïa ki jingpynbeit ïa ka leit ka wan khnang ban pynsuk bad pynthikna ïa ka jingïaid lynti kaba khlem jingeh ha baroh kawei ka jingïalehkai.