U bah Shakliar Warjri, myntri uba dei peit ïaka tnad Labour, Employment & Skill Development, Sports & Youth Affairs mynta ka sngi 23 tarik u kyllalyngkot ula wan sakhi ïaka jaka ai jinghikai (Institution) jong ka Greta Solutions Training Academy kaba don ha New Hill Loom Soo-Iung Jowai kaba ïatreilang bad ka Meghalaya State Skills Development Society (MSSDS), Shillong.
Haba ai jingkren ha kane ka sngi u bah Shakliar Warjri ula ai mynsiem ïa ki nongshah hikai hapoh ka Training ba kin long kiba trei shitom bad ban pynjanai shuh shuh ïa ka kam, khnang ba ynda la dep ka jingshah hikai kin ïoh ban seng ïala ki jong ki kam da kaba ïeng hala ki jong ki kjat, khlem da ap shuh ïa ka kam sorkar.
Ula kyntu ruh ïaki samla kiba la pyndep ïaka jingshah hikai, ynda kila ïoh lad ban plie ïala jong ki dukan shet Cake kin sngewbha ban khot ïa u ha kano kano ka jaka ne ki shnong ba ki don khnang ba un ïoh leit mad ïa ki jingbam jongki.
Ïa ka jingïalang ha kane ka sngi la pynïaid da u Sonjoy Shylla, Centre Head In charge jong ka Greta Solution Training Academy, Jowai ha ka jingdonlang u Skill Development Officer WJHD, ma Lambormi Suchen, ka kong M. Tariang, Admistrive Officer, Meghalaya State Skill Development Society Shillong nalor kiwei de.
Ha kane ka sngi la sam ruh ïa ki tiar shet kum ka Oven Machine na bynta ki khynnah jong ka West Jaiñtia Hills District kiba la pyndep ïa ka jingshah hikai shet Cake (Craft Bakery) kaba 3 bnai kiba la don 57 ngut.
Na ka liang ka Greta Solutions Training Academy kala dep ban ai shibun ki jinghikai hapoh ka West Jaiñtia bad kumjuh sha East Jaiñtia Hills kiba kynthup naduh ka rukom shet Cake (Craft Bakery, ki jinghikai shet bam (Street Food Vendor Stand-Alone), ka jinghikai shna light (Assistant Electrician), shna ïing Building (Assistant Masonry) ha kaba ki nongshah hikai kaba 3 bnai.
