Ka ophis jong ka Society for Urban & Rural Empowerment(SURE), Jowai ryngkat ka jingiatreilang bad ka Nehru Yuva Kendra Sangathan Jowai ka la pynlong ia ka National Youth Convention programme ha ka 10 tarik u kyllalyngkot 2022.
Ha ka jingialang la plie donburom ia kane ka prokram kaba la long ha ing skul ka H.K Singh Memorial Secondary School Jowai da u Rangbah Shnong jong ka Tympang Club u Ma E.S Shylla ryngkat ka jingiadonlang u Rev.Dr.H.H Mohrmen, Secretary ka Society for Urban & Rural Empowerment (SURE), ki nongtrei ka SURE bad kiwei pat.
Ha ka jingkren jong u kum u kongsan ha ka jingialang plie ia kane ka program u ong ba ki topic ba la iakren ha kane ka sngi ki long ki ba donkam bha na ka bynta iwei pa iwei khamtam ki samla kiba don lang ha kane ka sngi. U la iaroh ia ki kam ba trei ka SURE ha kaba kyntiew ia ka imlang sahlang khamtam sha nongkyndong. U kyntu ruh ia ki samla ban long kiba don ka jingkitkhlieh ia la ki kamram ne ia kino kino ki kam kiba la pynkhamti ha ki.
Ha kane ka sngi la ioh ia ki jingbatai halor saw tylli ki mat kaba nyngkong ka dei shaphang ka soft skill kaba la ai da u Rev.Dr.H.H. Mohrmen. Ha kane ka jingkren la kynthup ia ki phang kum ka Effective Communication, Empathy, Critical Thinking kaba don ka jingiadei bad ka Decision making bad ki Leadership style kiba bun.
Kaba ar ka dei shaphang jingiohlok dang khynnah ba la ai da ka Niwankan Shylla, kaba lai shaphang u drugs bad ki jingdih ba bunjait la ai da i Dakapaia Bareh bad ka ba saw ka dei shaphang ka AIDS ba la ai da i Coriniki Slong kiba long ki staff jong ka SURE. Ia ka jingialang la pyniaid da I kong Ailut Kyndait, ka jingkren pdiang sngewbha la ai da ka kong Pasqualina Lamare bad ka jingkren ai khublei la ai da ka kong Darimika Lywait na ka SURE.
Palat 50 ngut ki khynnah samla shynrang bad khynthei jong ki shnong bapher bapher na West Jaintia ki la wan ban iashim bynta ha kane ka program bad ki la pynpawba ki la ioh jingmyntoi shikatdei eh na kane ka prokram.
Ka Felicia Liam na ka shnong Demthring, West Jañtia ka la ong ba“ka jingshong kha khynnah ne ka jingshong kha khlem pat dei por kala kynrei bha sha nongkyndong kumjuh ruh ka jingdih buaid kumta kane ka prokam kala ai jingmut shikatdei eh ia nga.”
U Wikidaroilangki Lamare ba na Mynthong, Jowai ula ba “ki topic baroh kiba la kren mynta ka sngi ki dei kiba donkam, hynrei ka jingkren halor ka communication skill ka long ka ba donkambha bad kaba ai jingmutia ki samla ha ka jingim ba man la ka sngi.”
Ka Delphi Mystica Bareh ka samla na Nongtalang kala ong ba ka la iohjingmyntoi shikatdei eh na kane ka program bad kaba kham kongsan ka dei ka jingshaniah ha ka jinglah la jong bad ba kiei kiei baroh ki dei ban sdang na iing. Ia kane ka prokram la pyndep da kaba bud ryntih ia ki kyndon pyrkhing ka sorkar kiba iadei bad ka khlam Covid-19.
