Ka BJP ha ka jingialang ba la long mynta ka sngi ka 19 tarik Rymphang 2025 ha Delhi ka la rai bad jied ia ka Rekha Gupta kum ka Myntri Rangbah ha Delhi. Ka Rekha Gupta, ka ban long ka myntri rangbah kynthei kaba saw jong ka nongbah Delhi hadien ka Sushma Swaraj, Sheila Dikshit , Bad ka Atishi, kan bam smai lashai ka sngi ka 20 tarik Rymphang 2025 ha madan Ramlila.
Kum ban shu pynkynmaw ka Rekha Gupta ka la jop ia ka shuki MLA na Shalimar Bagh Konstitwensi pyrshah ia ka Bandana Kumari ka AAP bad ka Parveen Kumar Jain jong ka Congress da 29,595 vote.
Na ka liang ka Rekha Gupta ka pynpaw ïa ka jingsngewnguh kaba khraw ïa baroh ki nongïalam ba ha khlieh duh jong ka Party BJP kiba la shaniah ïa ka ban bat ha ka kam Myntri Rangbah ka Jylla. Kane ka jingshaniah bad jingkyrshan ka la ai bor bad ai mynsiem ia ka bad ka kular ba kan trei da ka jinglong hok kaba pura, ka jinglong ba janai bad ka jingaiti lut na ka bynta ka jingbha jingmiat, ka jingpynkupbor bad ka roi ka par kaba kongsan jong man la ki nongshong shnong jong ka Nongbah Delhi bad ban rah ia ka Delhi sha ki kyrdan kiba thymmai,” la ong ka Rekha Gupta.