Ka jylla Meghalaya kaba don ia ka station Rel ha Mendipathar, North Garo Hills kala ioh ia ka Rel kaba lah ban iaid da ka bor ding Elektrik ha ka sien kaba nyngkong eh, hadien ba ka tnad Indian Railway kala lah ban pyndep noh ia ka jingtrei ha ka 15 tarik mynta u bnai 2023.
Ka Indian Railway lyngba ka Northeast Frontier Railway (NEFR) da ka jingbuhthong ban pynduh ia ka jingpynmih ia ka lyer ne ka tdem kaba sniew (Net Zero Carbon Emitter) hapoh u snem 2030, kala trei shitom ban pynkylla dur ia ki lain rel ba rim sha ki lain kiba lah ban pyniaid ia ka Rel da ki bor ding Elektrik.
Ha kane ka kynti ka NEFR kala lah ban pyndep ia kane ka jingtrei kaba naduh Dudhnai, Assam haduh Mendipathar, Meghalaya kaba dei ka Single line kaba jngai 22.823 Km ha kane ka 15 tarik mynta u bnai. Kawei de ka lain ban pyniaid da ka Elektrik ka dei na Abhayapuri shaduh Pancharatna kaba dei ka double line kaba don ka jingjngai kaba 34.59 Km kaba la pyndep ha kane ka juh ka sngi. Ia kane ka project la pyntrei da ka Central Organization for Railway Electrification (CORE).
Ka Mendipathar ka dei ka station Rel kaba nyngkong eh hapoh ka jylla Meghalaya kaba la sdang ban treikam naduh u snem 2014. Ka jinglah jong ka tnad Rel ban pyndep ia kane ka project kan iarap shibun ban pynduh noh ia ka jingpynmih ia ka lyer sniew bad kan pynkloi ruh ia ka leit ka wan jong ki paidbah bad ka kit ka bah lyngba kine ki Rel Elektrik.