-Ka projek ba nyngkong eh hapoh ka ri India bala shna lyngba ka skhim MGNREGA-
Ka shnong Lahalein ka la long ka shnong kaba donbok eh ban ioh ia ka jaka pynkha ia ki symbai Dohkha ia kaba la tip kum ka Fish Eco Hatchery bad ka long ruh ka projek kaba nyngkong eh ha East Jaintia Hills District.
Ia kane ka projek la shna da ka VEC jong ka shnong Lahalein hapoh ka skhim MGNREGA ryngkat ka jingiatreilang bad ka Basin Development Unit (BDU), East Jaintia Hills District. Ia kane ka projek la wan ban plie ia ka da ka MLA jong ka Sutnga-Saipung ka kong Santa Mary Shylla mynta ka sngi 9.2.24 ha shnong Lahalein.
Ha kane ka sngi la iadonlang u Deputy Commissioner ka District u A. Baranwal, IAS, u Superintendent of Fisheries, EJH bah H. Kharbuki, u District Project Management (DPM) Basin, EJH bah H. Blah bad kiwei de.
Ka kong Santa kala pynpaw ka jingsngewiaroh ia ka ophis Superintendent of Fisheries, EJH bad ruh ia ki dkhot jong ka Lahalein VEC ba da ka jingiatreilang jong ki la lah ban pyndep ne pynurlong ia kane ka Fish Eco Hatchery kaba nyngkong eh hapoh ka District EJH. Kala ai khublei ruh ia u ma L. Tynsong u nongri Dohkha jong kane ka thaiñ uba la ju iarap ia kiwei pat bad dei lyngba ka jingiaitrei shitom jong u ban ri ia ki Dohkha kan long ka nuksa ia kiwei de.
Ka kong Santa ka ong ruh ba kane ka jaka pynkha symbai Dohkha kaba don ha Lahalein kan long ha ka juh ka pork um ka jaka pynneh pynsah dohkha hapoh ka East Jaintia Hills District. Kumta ka khot ia ka jingiatreilang jong baroh ki nongshong shnong khnang ban pynlong ia kane ka projek kaba iaid beit iaid ryntih.
La ioh ruh ka jingkren na u DC ka District, uba la aikhublei ia baroh ki ba don bynta ban pynlong ia kane ka projek kaba jop. U ong ruh ba kane ka jaka ne projek kan sa long kawei na ki lad kaba lah ban ai kam ai jam ia ki khun samla jong ka District.
La pyntip ruh ba kane ka Fish Eco Hatchery kaba don ha Lahalein ka dei kaba nyngkong eh ba la shna hapoh ka ri India lyngba ka skhim MGNREGA, da ka jingthmu ba kan pynmih haduh 15 million ki symbai Dohkha.
Kiwei de kiba ai jingkren ki kynthup ia u Superintendent of Fisheries, East Jaintia Hills District, bah H. Kharbuki bad u District Project Management (DPM) Basin, East Jaintia Hills District, bah H. Blah.