Hynne ka step jong ka 20 tarik u Kyllalyngkot, 2026, ha ka por kumba 3 baje mynstep, ka kynhun ba kyrpang jong ka West Jaintia Hills Police ryngkat bad u Waheh shnong bad ki dkhot ka Village Defence Party (VDP) jong ka shnong Demthring, ki la ioh kem ia saw ngut ki nong Bangladesh ryngkat bad kawei ka kali kaba don ia u registration number ML-04D 7339, kaba la ñiah da u Vishal Dkhar na Dawki. Ia kane ka kali kthong naduh Lad Demthring bad la ioh bat ia ka hajan ka Sanmala Guest House, Amlarem.
Ki pulit ki la ioh kem ruh ar ngut ki nong India u Meban Dkhar bad ka paralok jong u kaMelari Rasmut, ki la shah kem na Lad Demthring ryngkat bad ka kali jong ki kaba don ia u registration number ML-04D 4739.
Ha ka jingtohkit, u Meban Dkhar u la pynpaw ba dang don lai tylli ki kali kiba kit ia ki nong Bangladeshi kiba dang wan na Jowai sha Dawki. Da ka jingtrei khlem slem halor kane ka jingtip ki pulit ki la pynlong ka jingkhynra kaba jur ha ki bynta jong ka Amlarem.
Katba ha ka por kumba 3:45 baje mynstep, ki pulit kila kem ia lai tylli ki kali, kata ka ML-05AD 6424 kaba la ñiah da u Blessing Pamthied na ka shnong Jarain, ka ML-04D 4993 kaba la ñiah da u Twel Rongngi na ka shnong Shkentalang bad ka ML-04E 0640 kaba la ñiah da ka Rimi Lyngdoh na ka shnong Shkentalang.
La lap ba kine ki kali ki dang kit ia 14 ngut ki nong Bangladesh. Kumta, na kane ka jingkhynra la kem haduh 18 ngut ki nong Bangladeshi, 2 ngut ki nong India, 5 ngut ki nongñiah kali, bad la kurup 5 tylli ki kali.
La register ia ka mukotduma halor kane ka jingjia bad baroh ki briew kiba don bynta ha kane ka kam ki la shah kem na ka bynta ka jingtohkit bad ka jingtreikam katkum ki kyndon jong ka Immigration and Foreigners Act, 2025.
Ka West Jaintia Hills Police ka pynpaw ban nang pynlong ka pahara ha ki shnong ki thaw bad khamtam ha ki thaiñ khappud. Ka tnat Police ka kyrpad jur ia baroh ki waheh shnong bad ki VDP ba kin wan shakhmat bad ban ai ka jingïatreilang bad ka police ban tehlakam ia ki kam bymman bad ban iada ia ka imlang sahlang.
