Ka Khusnam ban ainam ia ka jingtbit ha ka shet jingbam jingdih bad ka akor sam bam sam dih ba tip kum ka India’s Most Prominent Food & Hospitality Awards-2023 la sam sha palat sawphew ngut ki riewtbit ha ka shet ka tiew bad ka jingnang ban burom ia ki para briew ha la ki shlem aibam aidih. Ia kane ka khusnam la ainam da ka Merit Awards Market Research Pvt Ltd sha baroh ki riewtbit ba la shah jied kyrpang ha ka kam shet kam tiew, kam pynbiang bam pynbiang dih bad ka ba nang ban burom ia ki nongbam nongdih. Na ka thaiñ Shatei Lammihngi ka Ri India la ioh tang artylli ki jylla, Assam bad Meghalaya ki ba kynthup ia ka Aiti Belti Trattoria na Shillong bad ka Khorikaa Restaurant na Guwahati.
U kongsan ha kane ka rong ka taw u dei u nongshet ba pawnam tam ha Ri India u Sanjeev Kapoor ba la don ryngkat ruh ki kynrem lyndan na ki shlem shna jingbam jingdih ba kongsan ha Ri India. Ia kine ki khusnam la jied kyrpang halor ka jingtbit ban shet ban tiew, ba bang ba shngiam ka bam ka dih, ba khud suba, ba pnah ban khring ia ki briew da ka akor burom bad kiwei kiwei ki jingtbit kyrpang ha ka liang ka jingiadei bad ka die jingbam jingdih.
Ka Khusnam kum ka basa bam ba biang tam na jylla la ioh pdiang da u Bah Balawanpynskhem Suting, ba ju sin kum u Bah Richie na ka bynta ka basa Aiti Belti Trattoria na Khyndailad, Shillong ha ka 1tarik Nailur, 2023 ha nongbah Delhi.
