Ka nongbah Shillong kala ioh ia ka khusnam kaba la tip kum ka “City with the Best Record of Public Involvement in its Transport Planning” na ka bynta ka project kaba la tip kum ka “Shared Commuter Service in East Khasi Hills (Shillong)” kaba la pyntreikam da ka Sustainable Transport and Efficient Mobility Society (STEMS)” jong ka sorkar Meghalaya.
Ia kane ka khusnam la sam mynta ka sngi (29/10/2023) ha ka jingrakhe ia ka Urban Mobility India Conference and Expo 2023 kaba 16 kaba la sdang naduh ka 27 tarik bad kut mynta ka sngi ha nongbah New Delhi.
U Manoj Joshi uba dei u Secretary jong ka Ministry ka Housing bad Urban Affairs, Government of India ula sam ia kane ka khusnam sha ka STEMS, ha kaba ka kong Isawanda Laloo, IAS kaba dei ka Secretary to the Govt of Meghalaya bad ka ba dei ruh ka CEO jong ka STEMS, ha ryngkat bad ki dkhot jong ka STEMS kila shimti ia katei ka khusnam.
Kiwei de ki nongbah hapoh ka ri India kiba la ioh ia kane ka khusnam ki kynthup ia ka Delhi, Lucknow, Srinagar, Bhubanesar, Kochi bad ka Jabalpur.
Kane ka dei ka sien kaba nyngkong eh ba ka STEMS kan ioh ia ka jingithuh na ka Sorkar Pdeng kaba la sdang pyntreikam naduh u snem 2021 lyngba ka Planning Department ka sorkar Meghalaya. Dei mynta u snem 2023 ba ka STEMS kala lah ban pynioh haduh 30 tylli ki bus na ka bynta ban kit ia ki khynnah skul nan kylleng ki bynta jong ka nongbah Shillong. Ia kine ki kali la pynbiang bad ki CCTVs ryngkat ki GPS khnang ban ai ka jingtip ba thikna ia ka por sha ia ki kmie ki kpa, bad kine ki bus ki don ia ki nongtrei kiba la ioh jinghikai bha ban lum ban lang ia ki khynnah skul.
Ban pyniaid beit pyniaid ryntih ia kane ka kam ka STEMS kala iatreilang bad ka Meghalaya Transport Corporation, ka NIC Meghalaya bad ka NIC na Uttarakhand, ryngkat ka jingiatrei ba janbha bad ka Shillong Traffic Police kumjuh ka Public Works Department (Roads).
