Ka jingkmih lynti kaba la slem jong ki paid Garo ban ioh ia ka jaka treikam jong u Lat ka Jylla ha ri lum Garo, kala urlong mynta ka sngi ka 12/01/2024 ha kaba u Lat ka Jylla u Phagu Chauhan u la wan ban plie ia kane ka jaka treikam ne ka Raj Bhavan ha ka nongbah Tura, jong ka West Garo Hills District.
Ha kane ka prokram plie ia ka Raj Bhavan ha Tura la iadon lang u Myntri Rangbah ka Jylla u Conrad K Sangma, u Thomas A Sangma shongknor ka Meghalaya Legislative Assembly, ka Agatha K Sangma MP na Tura bad u DC u Jagdish Chelani bad kiwei ki kynrem ki lyndan.
Haba ai jingkren ha kane ka sngi u Lat ula ong ba ka jingphohsniew jong ki paid Garo kala urlong haba la lah ban trei ia ka Raj Bhavan ha nongbah Tura. U la iaroh ia ka jingtreishitom jong kiba donkti ban pynlong ia kane ka sngi kaba jop. U Lat u kyrmen ba ka jingdon jong kane ka jaka treikam hangne kan pynkloi shibun ia ki lad jingiarap ha ri lum Garo.
U Chauhan u la phai ruh sha ki riewshlur jong kane ka thaiñ kum u Pa Tagan Nemminja Sangma bad kiwei kiba la aiti iala ka jong ka jingim na ka bynta ka bha ka miat jong ki nongshong shnong ka ri. U la buh ruh ka jingkyntu ia ki khun samla jong ka ri lum Garo ban long kiba noh synniang sha ka roi ka par jong ka Jylla, kumta yn pyndep ia ka jingthu jong u Myntri Rangbahduh ka ri India u Narendra Modi halor ka thong ‘Viksit Bharat Sankalp Yatra’.
Haba pynpaw ia ka jingkmen kaba khraw u Myntri Rangbah Conrad K Sangma ula ong ba kane ka dei ka khana pateng (History) hapoh ka jylla bad khamtam eh ha ka khana pateng jong ka ri lum Garo. U pynpaw ka jingsngewnguh ia u Lat ka Jylla uba la ai ka jingkyrshan ban pynlong ia kane ka projek kaba jop.
U Sangma ula ong shuh shuh ba kane ka ïing treika jong u Lat kaba don hangne ha Tura kan long kum ka dak jong ka jingialonglang kawei bad ban pyni ruh ba ki nongshong shnong jong ka jylla ki don ka jingiatylli. Kane ka projek ka la long kawei na ki projek kiba la slem ba ka sorkar mynta ka la lah ban pynurlong shisha. Ula pynpaw ruh ia ka jingsngewsarong ba ka Prisident jong ka ri India kan ioh ban sah ha kane ka ïing jong u Lat ha ka por ba kan wan ban iuhkjat ia ka ri Lum Garo ha ka jingwan plie jong ka ia ka Meghalaya Games ka ban long ha nongbah Tura.
Kane ka jaka ka don ha Danakgre jong ka nongbah Tura, la tei ia ka ha ka jinglut kaba Rs.24.1 klur bad ka don ia ka jingheh kaba 28.45 Acres.
