Ki pulit jong East Jaiñtia Hills District, ha ka 04.05.2023, hadien ba la ioh jingtip shaphang kawei ka trok kaba don ia u registration number AS-028-AC-0429 ba suba don ar ngut ki nongkhaii drugs bad kane ka trok ka dei kaba mih na ka shnong Kalain, Assam ban poi sha ki thaiñ Khlieriat, kumta ki pynlong ka jingap shrip ia katei ka trok ha shnong Byndihati, East Jaiñtia Hills.
Ha kane ka jingpynap shrip ia kane ka trok ha Byndihati Petrol Pump bad dei ha ka por 9:45 mynmiet, kane ka trok kaba kit lang bad ka dewbilat kaba don ia kitei ki ar ngut kiba suba khaii drugs ki Pulit kila bat ia ka trok bad ha ka jingjurip la lap ia 6 tylli ki synduk sabon, kawei ka tobacco container, kawei ka mobile phone bad ka pisa ba 5 spah tyngka na ki ar ngut kiba kynthup ia u Jaydar Ali (34 snem) na Khagrabari, Barpeta, Assam bad u Sanidul Islam (20 snem) na Hawli, Barpeta.
Hadien ka jingtohkit bniah la lap ba kine ki ar ngut ki rah ia u heroin uba khia haduh 65.32 grams.