Ki Pulit jong ka tnad Anti Narcotic Task Force (ANTF) hadien ba kila ioh jingtip shaphang uwei u briew uba thmu hiar sha ki thaiñ Kalain (Silchar) ban leit kit ia ki mar ba long be-aiñ, kumta kane ka kynhun ryngkat bad ki Pulit jong ka Umkiang PP hapoh ka jingialam jong u DSP (Crime) u B. Bhattacharjee MPS, kila pynlong ia ka jingkhang kdong ha shnong Umkiang.
Ha ka jingkhang kdong ki Pulit kila ioh ban bat ia kali Maruti 800 kaba shong utei u briew uba la tip kyrteng kum u Raju Dkhar bad khot sin u Precious, uba na ka shnong Suchen Lumjaraiñ. Ha ka jingkhynra jong ki Pulit kila ioh ban kurup 7 tylli ki synduk buh sabon ia kiba la thep lang da u drok (Heroin) uba don ka jingkhia kaba 75 gram. La kurup ruh ia ki 4 tylli ki mobile phone bad la bat lang ia katei ka kali.
Ryngkat bad u Raju Dkhar ki Pulit kila kem lang ruh ia u Lamphrang Kyndait uba na ka shnong Sabah Muswang, West Jaintia Hills.
Ha ka jingtohkit jong ki Pulit une u Raju Dkhar ula phla ia ka kyrteng jong u Jop Siangshai uba la kynnoh ba u dei u nongpynioh pisa ban khaïi ia kane ka kam be-aiñ. Na ka liang ki Pulit ANTF mar mar kila leit kiew sha Khliehriat bad kila kem noh ia une u Jop Siangshai. Ha kaba iadei bad kane ia ka Case la rejistar ha Lumshnong Police Station bad ka jingtohkit ka dang iaid shakhmat ban thwet shuh shuh sa ia kiwei pat kiba donkti ha kane ka kam pynkut ka tyllong khubor
