Hadien ka jingioh jingtip ba thikna, ka kynhun pulit kaba kynthup ïa ka Anti-Narcotics Task Force (ANTF) jong ka jylla Meghalaya bad ka pulit jong ka West Jaintia Hills District, ba don ki briew kiba la wanrah ia ki mar be-aiñ, kiba la wan na Silchar Assam ban poi sha nongbah Shillong, kane ka kynhun kala pynlong ia ka jingap kthem hapoh u pud jong ka Jowai Police Station dangstep phyrngap mynta ka 4 tarik u Nailar 2025.
Ha kane ka jingap kthem ka kynhun ki Pulit ki la ïoh ban bat ia ki ar ngut ki briew kiba dei ki snar nongkhaïi drug. Kine ki ar ngut ki dei kiba la ithuh kyrteng kum u Milton Chakraborty (34 snem) uba ju tip kum u “Lucky” bad uwei pat u paralok jong u, u Kasimuddin (26 snem), bad na ki la ïoh kurup haduh 52.02 gram u Drugs.
Kat kum ka khubor Pulit la iathuh ba kitei ki ar ngut ki la mih na Silchar ban leit sha Shillong da ka MTC Night Super Bus, bad la ha kaba ki pulit ki la ioh jingtip ba ki rah ia u Drugs drok be-aiñ. Kumta ha ka por 4 baje mynstep jong ka 4 tarik Nailar, ki pulit kila pynsangeh ïa katei ka Bus kaba don ïa u registration number ML-03-0189 ha Mihmyntdu, Soomer. Ha kaba la pynlong ia ka jingkhynra katkum ka Section 50 jong ka NDPS Act.
Ha katei ka jingkhynra, ki pulit ki la ïoh kurup ar tylli ki synduk sabon ba don u drugs ba la suba ba u dei u heroin, na u Kasimuddin, uba shong ha Punjabi Lane, Shillong bad kumjuh ruh la ïoh kurup sa lai tylli ki synduk sabon ba la thep ha ka plastic na u Milton Chakraborty, uba shong ha Happy Valley, Assam Bazar, Madanrting.
Ha ka jingpynshisha halor une u kynja jingdih pynbuaid ba la ïoh kurup ka la paw ba ka dei u heroin, u ba don haduh 52.02 gram. Ia une u drugs ba la ioh kurup la kurup katkum ki kyndon jong ka aiñ NDPS bad la register case ha Jowai Police Station hapoh Case No. 71(8)2025, hapoh ka Section 21(b)/29 jong ka NDPS Act.
Ka jingtohkit ia kitei ki ar ngut ka dang ïaid shakhmat na ka bynta ban ïoh jingtip bad lap shuh ia kiba dang donkti ha kane ka kam khaïi be-aiñ.
