Hynnin ka janmiet ki Pulit jong ka Umkiang PP, ha ka por kumba 7:45 PM, katba ki dang pynlong ïa ka jingkhynra ïa ki kali kiba ïaid na katei ka surok bah (National Highway-6) na Damcherra, Kuliang, ki la ïoh ban bat ia kawei ka kali ka kali Mahindra KUV 100 (silver grey colour), kaba don u registration number TR-07-B-0422 bad na kane ka kali ki Pulit kila kurup haduh 66.829 kilo u ganja.
Ïa kitei ki ganja la sop bad tap bha da ki brown tape bad thep hapoh katei ka kali, ki pulit ki la bat noh ïa ki ar ngut kiba shong ha katei ka kali kata u Rabi Debbarma, 43 snem kyrta, uba na ka shnong RM Thakurpara, Ranir Bazar, Jirania, West Tripura bad uwei pat uba dang 19 snem kyrta, la kurup ruh ïa ka kali ba ki pyndonkam bad ar tylli ki mobile phone.
La register case pyrshah ïa kitei kiba donkti ha Lumshnong Police Station, case No 18(3)2023, hapoh ki kyndon aiñ 21(b)(ii)(c)/29 NDPS Act bad ka jingtohkit ka dang ïaid.
