Mynta ka sngi u ma Helpme Hamkheiñ Mohrmen u la shah pynkup burom ha ka Martin Luther Christian University (MLCU), Shillong ha ka jingpynkup burom ba 14 (MLCU 14th Convocation 2021) jong ka na ka bynta ki nongpule kiba la pyndep ia ki kyrdan pule bapher bapher hapoh katei ka University.
U ma Helpme wat la u don ia ka rta kaba la khamheh bad wat hapdeng ka jingbunkam, la ka dei ha ki kam Balang, kum u nongthoh (Columnist), kum u riew ieit mariang (Environmentalist), kum u President jong ka SURE bad kiwei kiwei de ki kam kiba u bat, hynrei u dang lah ban pyndep ia kane ka kyrdan kaba halor kaba la wanrah burom ia u shimet, ia ka ïing ka sem, ia ka Balang bad ia ka shnong ka thaw jong u.
Ka thesis jong u ma Helpme ka long “Cultural History of Jañtia Hills in stories, stones and traditions” hapoh ka jingkhmih jong u Prof Glenn Kharkongor kum u Supervisor bad Dr Fabian Lyngdoh kum u co-Supervisor.
Ka jinglah jong u Helpme ba ban pyndep ia kane ka kyrdan ka long ruh kum ka jingai mynsiem ia kiwei de ki samla kiba dang biang ka rta / por ba kin shim ia kane ka nuksa, namar haba don ka mon ka don ka lynti.
Haba iakren bad u Yutipnews u ma Helpme ula kyntu ia ki samla da kaba ong “Ka jingïaineh bad batskhem ïa ka thong wat hapdeng ki jingeh bad jingduh jingkyrmen, ka jingnang ban bate ïa ka por wat hapdeng ka jingbunkam bad ka jingïaineh skhem bad ka jingshaniah ha ka bor Blei ki long kiba donkam haduh katta katta”.
Kum ban shu pynkynmaw ba u ma Helpme udei u khun jong i ma (L) Hamkheiñ Pariat bad i kong (L) Ïaineh Mohrmen na Ïawmusiang Jowai, ula pyndep ia HSLC (Matrik) jong u na Jowai Government High School, Jowai ha kata ka por (mynta Jowai Govt. Higher Secondary School, Jowai), nangta ula pyndep ia ka BA na Kiang Nangbah Govt. College, Jowai, ula ju pule ruh sha Bilat ha ka lain Certificate in Ministry na ka Unitarian College, Mancherter, United Kingdom, ula pyndep ia ka MA in Christian Studies na Madras University bad mynta pat ia ka PhD na Martin Luther Christian University, Shillong.
