“Lada ka Sorkar ka kwah ban leh jubor ngin sa ïapeit”
Hadien 4 bnai ba ka Sorkar Jylla ryngkat ka jingiatreilang bad ka Tnad Shillong Municipal Board (SMB), ki la lah ban pynkynriah ia kiba shong die jingdie madan ha ki thaiñ 9-Lad sha ka Parking Lot jong ka MUDA. Hynnin ka sngi sa shisien ka SMB ka la leit ban kyndang naphang sa ia kiba die jingdie da kaba iaid kylleng kylleng ka 9-Lad kiba kynthup ia kiba die sha, soh, kwai bad kiwei ki jingdie barit da kaba beh bad knieh ruh ia ki mar jong ki.
Na ka jingklumar hynnin ka sngi, u Bah Ardent Miller Basaiawmoit ryngkat bad katto katne ki Dkhot jong ka Voice of the People’s Party (VPP) ki la leit ban hiar sha katei ka jaka ban iakren ia ka jingeh ki paidbah bad ha kajuh ka por ban ai mynsiem ia ki ban bteng ia ka jingdie da kaba shu iaid kylleng kylleng ym ban shong hajuh.
Na ka liang u Bah Ardent u la ong ba ka Seng kam ju wan ban tular mynshwa halor ka jingthmu jong ka Sorkar ban pynkynriah sha MUDA namar ka jingkhapngiah ka 9-Lad hynrei mynta namar ba ki nongdie jingdie kim dei shuh kiba shong hajuh bad kiba pynkhapngiah ia ka iaid ka ieng. “Lada ka ktah bad pynwit ia ka iaid ka ieng ngim pynshlur” pynshai u Bah Basaiawmoit.
U Bah Ardent u la kynthoh ruh ia ki nongsynshar ha ka Jylla namar ka jingleh jong ki, ka long kaba pynpaid bad pyniasniew ia ki paidbah, hynrei ka jingwan jong ki (VPP) ka long ban pyniatylli, u la iathuh.
“Lada ka Sorkar ka kwah ban mih jingklumar to ai kin khang” ong biang u Bah Ardent.
Ha katei ka jingleit iakynduh ia ki paidbah, u Bah Basaiawmoit u la ioh kabu ruh ban kynduh markhmat ia ki Nongtrei jong ka SMB ha kaba u la kyntu ia ki ban leit phai noh sha Ophis treikam jong ki bad ban yn pynthud ia kiba die jingdie.
