Buh thong ban wanrah shibun ki dohkha sha ki ïew
Ka Fish Farmer’s Producer Organization haka jingïalang kaba la long mynta ka sngi 27/09/2023 ha ophis treikam Suprentendent of Fisheries West Jaiñtia Hills District Jowai, kala ïoh ban jied ïa ki nongkitkam ba thymmai jong ka.
Hashwa ban jied ya ki nongkitkam ka Fish Farmer’s Producer Organization la ïoh ïa ki kyntien sneng bad ki jingpynshai halor ka jingthmu ban seng ïa kane ka kynhun bad kumjuh ïa ki jingmyntoi kiba mih na ka jingdon kane ka seng, kiba la pynsngew da ki ophisar jong ka tnad Suprentendent of Fisheries West Jaiñtia Hills District Jowai kiba kynthup ïa u ma R. Rymbui Superintendent of Fisheries, u ma B. Shylla Fisheries Officer bad kiwei de kiba ïadon ha kane ka prokram.
Ïa ki nongkit kam jong ka seng la jied ïa u President ma Elnathan Pale, Vice President ma Chem Buam, General Secretary ma Rilut Dkhar, Assistant Secretary ma Lakhon Dkhar, Finance Secretary ma Puramon Bareh, Publicity Secretary ma Rismil Phawa bad ka Organizing Secretary kong Syrpai Sna.
La pynsngew ba ka thong jong kane ka seng ka long ban kyntu lang ïa ki nongri dohkha napoh ka thaiñ ba kin wanrah shibun ki dohkha da kaba pynpoi ïa ki sha ki ïew ki hat bad kumjuh haka jylla hi baroh kawei.
