Ïa ka ophis ba thymmai jong ka Soil and Water Conservation (Beat office) kaba peit ïa ki kam pynroi jong katei ka tnad treikam, na ka bynta ki 47 tylli ki shnong kiba hap hapoh ka Elaka Raliang la plie paidbah mynta ka sngi ha shnong Laskeiñ West Jaiñtia Hills District.
Ha kane ka sngi u Myntri sorkar Jylla ba dei peit ïa ka tnad Soil and Water Conservation u Marcuise N. Marak ula wan ban plie ïa u mawnongrim jong kane ka ophis ka Soil & Water Conservation (Beat Office) kaba hap hapoh ka Laskeiñ C&RD Block, West Jaiñtia Hills haka jingdonlang u MLA ka thaiñ ma Nujorki Sungoh, ka Director Soil & Water Conservation Department kong Ibashisha Rynjah, u Divisional Soil and Water Conservation Officer Jowai Territorial Division ma Taiwanyoo War.
La pynsngew baka jingheh jong kane ka jaka ka don haduh 1,06,430 square feet ïa kaba la ai sngewbha da ka Laskeiñ Dorbar Shnong, ban tei ïa katei ka jaka treikam ka Beat office.
U Marcuis N. Marak ha ka jingkren u la ong ba ka jingdon jong kane ka ophis ka long ka jingmyntoi kaba khraw eh ïa ka paidbah nongshong shnong jong katei ka thaiñ ha ki sngi ban wan, khamtam eh ïa kitei ki 47 tylli ki shnong.
Ula ong kane ka ophis kan ïarap kumjuh ïa ki paidbah jong ka thaiñ ba kin ïoh jingmyntoi ban shna pynbha pynmiat ïa ki jingtei bapher bapher kiba ïadei bad kane ka tnad naduh ki umbam umdih, ki jingkieng, ki dam bad kiwei de.
Shuh shuh ula ong kane ka ophis ka lah ban pyntreikam khambha ïa ki skim pynroi jong ka tand Soil and Water Conservation, ha ka juh ka por kan ïarap ban pynsuk ïa ka jingtreikam kaba ïajan eh bad ki shnong bad kim donkam shuh ban leit mih shaduh Shangpung Range jong ka ophis Soil and Water Conservation.
Haka juh ka por u Myntri ula ai khublei ïa ka Dorbar Shnong Laskeiñ kaba la synñiang sngewbha ïa kane ka jaka na ka bynta ka jingmyntoi jong ki paidbah.
Hadien kane u Myntri ha ryngkat u MLA ka thaiñ kila shim bynta ha ka jingthung ïa ki tynrai dieng. Kiwei de kiba ïadon lang ki kynthup ïa u Additional Deputy Commissioner, West Jaiñtia Hills bah M B Tongper, ki nongtrei ka Soil & Water Conservation, u Waheh Shnong ma Pynbeitlang Lyngdoh, u Daloi Elaka Raliang ma Chawas Lyngdoh, ki paidbah ka shnong nalor kiwei de.
Ïa ka jingïalang ha kane ka sngi la pynïaid da ka ophis u Divisional Soil & Water Conservation Officer Jowai Territorial Division, West Jaiñtia Hills.