Ka President ka Ri India, ka Droupadi Murmu, ka la pynkup burom ia ki 17 ngut ki khynnah, ha ki hynñiew tylli ki kyrdan, na ka bynta ki jinglah ba kyrpang jong ki, ha ka jingialang kaba la pynlong mynta ka sngi ha Rashtrapati Bhavan Cultural Centre.
Na ka jylla Meghalaya u Kisen Wanniang u la ioh ia kane ka khusnam namar ka jingshlur jong u kaba long ka nuksa. U samla Kisen Wanniang uba dang 15 snem ka rta na ka shnong Mawlangwir, South West Khasi Hills u la pyni ïa ka jingshlur da kaba u la lah ban pyllait im ïa ki saw ngut ki khynnah kiba dang 9 haduh 12 snem ka rta na ka wah Maweitksar ha ka por ba jur u slap.
U Kisen u dei u khun jong kawei ka kmie kaba trei marwei kaba trei kum ka nongbylla ñing, u Kisen u dang sait jain harud wah haba u iohsngew ia ka jingpyrta jong ki khynnah ban iarap. Khlem da artatien bad khlem da pyrkhat ia la ka jong ka jingshngaiñ, u la ngam shapoh wah bad da ka jingshlur u la ioh ban pyllait im ia uwei pa uwei na kitei ki khynnah. U Kisen Wanniang u la shah pynkup burom ia ka khusnam Pradhan Mantri Rashtriya Bal Puraskar namar ka jingshlur jong u kaba long ka nuksa ha ka liang ka Jingshlur.
Haba kren ha kane ka sngi, ka President ka la ai khublei ïa baroh ki nongïoh khusnam bad ong ba ka ri baroh kawei bad ka imlang sahlang ka sngew sarong ïa ki. Ka la iathuh ha ki khynnah ba ki la leh ia ki kam kiba phylla, ki la ioh ia ki jingjop kiba phylla, ki don ki jinglah ki bym don pud, bad ki don ia ki jinglong ki bym lah ban ianujor. Ki la pyni nuksa ia ki khun ka ri.
Ka President u la ong ba ka jingai lad bad ka jingithuh ia ki sap jong ki khynnah ka la long shi bynta jong ka dustur jong ngi. Ka la ban jur ba dei ban pynkhlaiñ shuh shuh ia kane ka dustur. Ka la ong ba ha u snem 2047 ha kaba ngin rakhe ia ka jingdap shispah snem jong ka jinglaitluid jong ka ri India, kine ki nongjop khusnam kin long ki nongshong shnong ba shai jong ka ri. Kum kine ki khynnah shynrang bad kynthei kiba don sap kin long ki nongtei ia ka ri India kaba la roi.