Kumshi bynta ban kyrshan ia ka jingwanrah ia ka khuid ka suba hapoh ki shnong ki thaw jong ka East Jaiñtia Hills District mynta ka sngi ki ar tylli ki shnong kiba kynthup ia ka Khliehriat West bad ka Lad Rymbai kila ioh ia ki trok kit ñiut (Garbage Trucks) lyngba ka District Mineral Foundation (DMF).
Ha kaba iadei bad kane ka jingaiti ia kitei ki trok kit ñiut sha kitei ki ar tylli ki shnong, la pynlong ia ka jingialang ha Khliehriat West Community Hall bad ka Lad Rymbai Datsympein Community Hall.
Ia ka jingaiti ia ka trok sha ka shnong Khliehriat West la wan ban iadon bynta da u Myntri ka sorkar Jylla uba dei ruh u MLA ka thaiñ u ma Kyrmen Shylla kum u Kongsan, ha ka jingdon ryngkat u Deputy Commissioner, ka East Jaintia Hills District u Shivansh Awasthi, IAS, u Sub-Divisional Officer (SDO)- Sadar East Jaintia Hills District u M. Kumar, IAS, ka MDC jong ka Rymbai-Khliehriat ka kong Violet Lyngdoh, u Principal ka Jaintia Eastern College u Dr. P. Nongtdu, ki Waheh Shnong bad ki riew paidbah ka thaiñ.
U ma Kyrmen haba ai jingkren ula kyntu ban don ka mynsiem jingiatreilang da baroh kiba iadon bynta ha kane ka kam khamtam ki nongialam shnong ha kaba iadei bad ka jingwanrah ia ka khuid ka suba, da kaba pyndonkam hok ia kane ka trok, khnang ban wanrah ia ka khuid ka suba ia ka nongbah Khliehriat hi baroh kawei.
Ha kane ka jingialang u Myntri ula pyntip ruh ia kiwei de ki lad kam pynroi kiba ka sorkar kala shim hapoh East Jaintia, ha kaba kawei na kita ka long ka jingmang ban pyntrei ia ka projek jong u surok ban pyniasoh ia ka thaiñ San Shnong jong ka East Jaintia bad ka Shkentalang ha West Jaintia kaba shongdor Rs.125 klur tyngka. Ula ong ba da ka jingdon jogn kane ka surok kan pynsuk ia ka khaïi pateng bad kumjuh ia ki kam jngohkai pyrthei sha kine ki thaiñ.
Katba na ka liang jong u DC uba dei ruh u Chairman ka DMF Trust East Jaintia Hills Districty u Shivansh Awasthi ula ong ba da ka jingdon jong kane ka trok kit ñiut la khmih lynti ba ki jakhlia jakhlaid bad ki ñiut ki ñier kiba don ha ki jaka iew yn sa lah ban pynkhuid noh ia ki. U la ong ruh ba ki nongbreit jakhlia ki dei ban pynkyrpang la ka jong ia ki jakhlia kiba long jhied bad kiba long rkhiang.
Shuh shuh u la ong ban a ka liang ka DMF lane na ka MNREGA kin sa shna ia ka jaka bret ñiut na ka bynta kito kiba lah ban pynkylla sha ka sboh, katba ia ki plastic bad kiwei pat ki bym long sbohh yn sa pyllang bad leit pynpoi sha ki Cement factory na ka bynta ban thang ia ki.
Ha ka jingialang kaba la pynlong ha Lad Rymbai Datsympein, hangne ruh la wan ban iadon lang da u MLA ka thaiñ ma Kyrmen Shylla, u Deputy Commissioner, East Jaintia Hills District, u Shivansh Awasthi, IAS, u Sub-Divisional Officer (SDO)-Sadar, East Jaintia Hills District, u M. Kumar, IAS, ka MDC jong ka Rymbai-Khliehriat, ka kong Violet Lyngdoh, ki Waheh Shnong bad ki nongshong shnong jong ka thaiñ Lad Rymbai.
