U ma Ohiwot Laloo, u khun ka (L) Misily Laloo bad u (L) Sabut Jones Nongbri na Ladthadlaboh, u lok ka kong Merry Merza Najiar na Loomkyrwiang Jowai ula ïoh ïaka kyrdan Silver Star Award naka Bharat Scouts & Guides, National Headquarter, New Delhi ha kane ka 26 tarik u Naiwieng kaba dei ka 19th National Jamboree kaba la pynlong ha Jylla Lucknow.
Ïa kane ka khusnam Silver Star Award la sam da ki bor pynïaid ka Bharat Scouts & Guides, National HQ, New Delhi halor ki kam ba bha jong u ma Ohiwot Laloo, kiba ula leh naduh u snem 1979 kum u khynnah skur (Scouts), u nonghikai (Scout Master) bad u nongkitkam hapoh ka District Association jong ka Jaiñtia Hills District bad haka jylla baroh kawei, shi bynta naka thong ban pynkhlaiñ ïa ka Movement bad ban saiñdur ïa ki khynnah hapoh ka Scouts & Guides Movement.
Naduh ba ula shimti ïa kane ka kam ula long u nongïalam ïa ki khynnah Scouts-Guides hapoh ka District naduh u snem 1988, ha ka kyrteng ka Scouts-Guides Jowai Open Unit, ula pynmih haduh 22 ngut ki khynnah Scouts-Guides kiba la ïoh ïa ka National Award (Rashtrapati Award) bad 150 ngut ki Rajya Puraskar Scouts & Guides (State Award).
Ka jingdon bynta jong u ha ka Scouts-Guides Movement ha ki 47 tylli ki snem khlem shongthaid kala long ka jingkyrkhu kaba khraw ïa ki khynnah Scouts-Guides hapoh ka District kumjuh hapoh ka Movement baroh kawei da kaba sdang ïa ki kam kynthup ïa ki Camping, Awareness Programme, Youth Exchange Programme hapoh ka District, haka Jylla bad shabar kumjuh.
U ma Ohiwot Laloo naduh ba u long kum u Scouts haduh mynta ula ïoh lad ban mihkhmat ha ki Programme bapher bapher kynthup naduh ki International Level, National Level, Regional Level, State Level Programme kiba la pynlong ha kylleng ka jylla jong ka Ri India bad shabar ka Ri.
Kaba sngewkmen shuh shuh u long ruh uba nyngkong napdeng ki Scouts Master jong ka Ri-Lum Jaiñtia uba ïoh ïa kane ka nam bad kane kala long ka burom bakhraw ïa ka ïing ka sem, ka shnong ka thaw, ka Ri bad ka jaitbynriew.
U Ohiwot Laloo haduh mynta u dang long u Nonghikai ka Jowai Govt. Girl’s Higher Secondary School, ula bat ruh kum u Jt. State Secretary, Meghalaya Bharat Scouts & Guides, Headquarter Shillong, katba hapoh ka Indian Red Cross Society ula long u District Secretary, Indian Red Cross Society, West Jaiñtia Hills Unit, Jowai.
Nalor ka Silver Star Award kaba ula ïoh mynta u snem, kiwei de ki khusnam kiba ula ïoh hapoh ka Scouts-Guides Movement ki long ka Medal of Merit ha u snem 2010, Long Service Medal Award ha u snem 2021 lyngba ka Meghalaya Bharat Scouts & Guides, Shillong nangta ka District Teacher Award ha u snem 2023, State Teacher Award ha u snem 2024 lyngba ka Meghalaya Education Department.
Halor kine ki burom kiba ula ïoh ula pynpaw ka jingsngewburom kaba khraw eh ïa baroh ki khynnah Scouts, Guides, Rovers, Rangers, Scout Master, Guide Captain jong ki Unit bapher bapher kiba ula ïoh lad ban don bynta lang ha kiba bun ki prokram hapoh ka Movement.
