U Bah Tanly Lapasamna ka shnong Mootyrchiah, Laskein Block, WJHD, u long u nongrep ba nyngkong eh na ka District ban ioh ia ka khusnam “Millionaire Farmer of India” ha ka 7 tarik u bnai Nohprah, 2023 kaba la long ha PUSA Mela Ground’, New Delhi.
Ha kane sngi la pynkupburom ia bun ngut ki nongrep na ka Ri India baroh kawei ki ba la khamshemphang bad minot adkar ha ka kam rep kam riang bad ka ri jingri. U Bah Tanly Lapasam u la ioh pdiang ia kane ka khusnam bad la synran ia u da u Dr. R Suchiang, Subject Matter Specialist (Animal Husbandary & Veterinary) jong ka iing treikam jong ka Krishi Vigyan Kendra, Jaintia Hills kaba don ha Wahiajer.
Katkum ki jingtip ba ioh lum, u Bah Tanly Lapasam u long u nongrep uba trei shitom bad duriap bha ha ka ri jingri bad kumjuh ha ka rep ka riang. U long ruh u briew uba shemphang ha ka pyrkhat pyrdain bad kumjuh u ba tih bniah bad wad sani kumno ban pynmanbha ia ka rep ka riang jong u. U BahTanly Lapasam u ri ia ki jingri kum ki sniang bad ki syiar bad ha kajuh ka por u pynkha ia ki symbai sniang bad die ia ki jingbam syiar, nalor ka rep ka riang kum ia u kba, ki jhur ki jhep, ka rep tit bad ri ngap da kaba pynwandur kum ka rukom rep kyllum.
U ne u nongrep u long uba smat bad u la ioh ia shibun ki jinghikai bad jingkyrshan lyngba ka ka iingtrei kam jong ka Krishi Vigyan Kendra, Jaintia Hills. Katkum ka jingbatai jong u, u la iathuhba ka jingiohnong jong u ka long kumba 12 lak shisnem bad da kane u lah ban kyrshan ia ka iing ka sem bad ha kajuh ka por ba un nang pyniar ia ka rep ka riang jong u na kawei ka snem sha kawei pat.
U ne u nongrep u kyntu bad pynshlur ia ki para nongrep ban trei shitom, ban minot thop bad kumjuh ban wad ia ki rukom rep kiba kynsai bad kiba iadei dur kat kum ka juk mynta khnang ba kin ioh nong bad shim ruh ia ka rep ka riang kum ka lad kamai bad ha kajuh ka por ban ai kam ai jam ia ki khynnah samla bad ki para nongrep.
