Mynnin ka miet ha ka por kumba 9 baje ei ei, ka kynhun bakyrpang jong ka Jowai Police ha ka por ba pynlong ia ka jingtalasi (checking) ia ki kali ha Jowai Byepass NH-6 ki la ioh ban bat ia kawei ka kali Mahindra Bolero (rong lieh) ka ba don u registration number MZ01R-0463 ka ba la niah da u N. K. Thangtea bad na kane ka kali ki pulit ki la ioh kurup ia lai tylli ki synduk plastik ia kiba la tap bha da ki kot najrong.
Ha ka jingkhynra ia kitei ki synduk plastic ki pulit ki la lap ba ki don haduh 7 tylli ki jait sim Hornbill ia kiba la suba ba kidei kiba la thmu ban shalan tuh.
Na ka liang ki pulit kila ai jingtip mar mar sha ki nongtrei jong ka Tnat Wildlife Jowai. Ha ka jingjurip jong ki nongtrei kane ka tnat kila pyntikna ba kine ki jait sim kidei ki ba la jan duh jait kiba la pynhap hapoh ka schedule 1 jong ka Wildlife Protection Act.
Ha ka jingiadei bad kane ka jingjia ia u nongniah bad ia ka kali la bat noh bad la aiti sha ka Tnat Wildlife ban leh ia kaba donkam.
