Mynta ka miet ha ka por kumba 8:40 baje ei ei, ki dkhot jong ka VDP Nongtalang Khlachympa ki la ioh jingtip ba don u briew uba ipylla uba wan poi harud shnong Nongtalang, kaba hap hapoh ka Amlarem Sub-Division, West Jaintia Hills District.
Mar sien tip ia kata khlem da pynslem ki VDP jong ka Nongtalang Khlachympa kila trei shitom ban thwet bad beh thong ban ioh kem ia utei u briew. Tang shiphang la ioh ban bat ia u hangta hi harud shnong bad la wanlam ia u ha office treikam jong ka dong Khlachympa, Nongtalang.
Haka jingtohkit ba malu mala da ki VDP, la sngewthuh ba une u briew u dei u Negro u ba wan na ka ri Nigeria bad la suba ba ula wan poi lyngba ka ri Bangladesh ban ioh rung shapoh India. Ha kaba nyngkong haba ki VDP kila pyrshang ban kylli pyrthew ia u, ula kren kyllaiñ da kumne da kumtai bad haba ki jurip ia ki kot ki sla jong u ruh ki long kiba la i rim bad ki bym da shai shuh.
Kumta hi mar mar ki VDP kila ai jingtip sha ki Pulit jong ka Dawki Police Station kiba la wan ban shimti ia u bad rah sha thanat ban ioh leh iaka ba donkam katkum ki kyndon jong ka aiñ.
