Ka Khasi Students’ Union (KSU), Upper Shillong Circle ha ryngkat ka Mawprem Circle ha ka janmiet jong ka 14 tarik u bnai Nailar 2025, ka lah ïoh ban bat ïa hynriew ngut ki bar jylla kiba kam ïalade ba ki dei na Bihar kiba die ïa ki mar jingialehkai bad mar bam ha shi lynter ka surok Rilbong Umshyrpi.
Ka Seng ka la lap ruh ba kine ki bar jylla kim don ïa kino kino ki kot ki sla kiba biang ha kaba uwei na ki u dei ruh u ba hap hapoh hapoh ka 18 snem ka rta.
Hadien ka jingwan peit ïa ki kot ki sla na ka Anti infiltration Department la lap ba na ki hynriew ngut, saw ngut ki dei ki bym biang ki kot ki sla, kumta na ka liang ki pulit kin sa leit ban pynphai noh ïa ki sha la ki shnong.
Ka Seng ka sngewkhia mynsiem halor ka jing bym pyntreikam hok ïa ka Infiltration Gate bad kaba buh ruh ïa ka jingkylli ïa ka Labour Department halor ka jingtlot jong ka ban khmih bad pyntreikam ïa ki aiñ.
Ka Seng ka la kyntu jur ïa ki bor ba dei khmih ba kin shim khia bad talasi ïa ki mynder khlem ki kot ki sla ba biang bad ka seng ka lah ong ruh ba nangne shakhmat kan dang peitngor bad kan nym ai lad ïa kino kino ki mynder ban wan shim kabu ha kane ka jylla bad ha ka Ri.
