Mynta ka sngi ki pulit ANTF jong ka East Jaiñtia Hills District ryngkat ka jingiatreilang bad ki pulit jong ka Umtyra Infiltration Check Point, hapoh ka jingialam u Additional Superintendent of Police East jaintia Hills District, u bah Banlamphrang Jyrwa bad u DSP East Jaintia Hills District, u bah Jason Myrom, ki la ioh ban bat ia kawei ka kali Maruti Zen kaba wan na Silchar bad bat ruh ia ki ar ngut ki briew ba kit ia u drok da kaba thmu ban pynpoi sha nongbah Shillong.
Ia kine ki drok Heroin ba khia 72 gram bad 17 strip u dawai kuli Nitrazapam la ioh ban kurup na ki ar ngut ki briew kiba don kti kiba la tip kyrteng kum u Heirtami Dkhar 29 snem, uba na ka shnong Madanpatien Ialong, West Jaintia Hills District bad u Rajen Pale, 25 snem, uba na ka shnong Lumpyrtuh, Mihmyntdu, West Jaintia Hills District.
Kitei ki ar ngut kiba kit ia kine ki drok, ki la buhrieh ia ki drok ha ka met jong ki hapoh ki jaiñ ba ki phong katba ia ki dawai kuli Nitrazapam pat la lap na ka kali ba ki pyndonkam, ki pulit ki la kurup noh ruh ia ar tylli ki mobile phone bad ia ka kali ba ki pyndonkam kaba don ia u registration number WB 02 P 2867 kaba kila wan na Silchar bad thmu ban poi sha nongbah Shillong.
Ki Pulit kila register case ia kine ki ar ngut ha khliehriat PS hapoh ka kyndon NDPS Act. Ka jingtohkit ia ki ka dang iaid shaphrang ban lap ia kiwei pat kiba donkti ha kane ka kam khaïi drok.
Kum ban shu pynkynmaw ba dang shen ha ka 30 tarik u Jylliew mynta ka snem bad 3 tarik mynta u bnai ki pulit ka East Jaintia Hills District ryngkat ka jingiatrei lang bad ki pulit jong ka Infiltration Check Post Umtyra ki la ioh kurup shibun ki drok bad kem ruh ia kiba donkti.