Ka jingialehkai phutbol kaba la tip kum ka 1st Open to All 40-Above Veteran Knockout Football Tournament-2022, kaba la pyniaid da ka West Jaintia District Sports Association (WJDSA), kaba dei ruh shi bynta na ka jingrakhe ia ka jingdap 50 snem jong ka Association, mynta ka sngi kala poi sha kaba kut, ha kaba ka Rympei PIP FC ka la ioh ban rah ia ka nam lahduh da kaba pynliem ia ka Friends United da 1-0 kol, ha ka jingiakhun kaba la pynlong ha Kiang Nangbah Stadium, Ladthadlaboh Jowai.
Haba phai sha ka jingiakhun kala longshisha kaba itynnad bad kaba ia ryngkat bor bha ha kaba ha ka jingiakhun jong ka kylla step ka la shu kut noh khlem don ba ioh ban thep kol ne pynkhih jar, katba ha ka kyllamiet pat jong ka jingiakhun ha ka minit kaba 42 ka Rympei PIP ka la ioh ban thep ia ka kol lyngba u Marshal Kurkalang bad kane ka jingiakhun ka la kut noh da 1-0, kumta ka Rympei PIP ka la long ka lah duh ha kane ka lympung Veteran.
Ha kane ka lympung jong ka jingialehkai phutbol jong 40 snem ka rta shaneng ia ka nam Man of the Match la ioh da u Albert Shanpru jong ka Friends United. Ia ki khusnam mynta ka sngi la sam da u kongsan u ma Chibor Najiar uba long u Superintendent Engineer PHE, Rural Circle Shillong, ha ka jingiadon lang u DSO WJHD ma K. Pasah, ma L. Laloo Honary Secretary WJDSA, ma EMH Pasah, ma Patrick Lamare bad kiwei de ki dkhot ka WJDSA bad kiba shah khot sngewbha.
Ha kane ka juh ka sngi ka WJDSA la ai ruh ki jingaisngewbha sha u Rapmiki Sutnga, uba na Chutwakhu Jowai, uba la noh synniang da ka Stretcher sha kane ka Association ha kine sngi bala dep.
