U Superintendent of Police ka West Khasi Hills District ula pyntip ba u don u wei u rangbah ba la tip kyrteng u Shelmikstun Nongphud ba la 44 snem ka rta uba ju khot ieit Bahnah uba dei u khun jong ka kong Moris Nongphud na ka shnong Domshohksoin ha ki thaiñ Rambrai ula jah nala ïing naduh u bnai Lber mynta ka snem bad haduh mynta ka sngi u khlem pat poi ïing.
Katkum ka ejahar kaba la buh da ka kmie jong une u rangbah ha ka 17 tarik mynta u bnai la iathuh ba une u rangbah u don ka rynïeng kaba 5 phut 4 inshi, ka sniehdoh kaba shai, ha ka por ba u mih na ïing u phong da ka T-shirt rong lieh bad ka jaket shiteng, u deng ruh bad ka towel ha ka ryndang jong u. u phong ka patlun kaba jrong kaba dei rong ïong, u phong da ki slipar bad u long u briew uba bam kwai bad dih duma.
Na ka liang jong u SP u la kyntu ia kino kino kiba iohi ia une u rangbah ba kin sngewbha ban ai jingtip mar mar sha ki Police Station ba marjan jong ki.