Ka Shillong Municipal Board (SMB) hynne ka sngi ka 21 Naitung 2025, ka la bteng biang ban khynra ia ki nongdie madan ha ka thain 9-Lad da kaba phah pyntikna la ki la don ne em ia ki syrnod lane ka Certificate of Vending (COV) ia kiba ki la ioh na ophis SMB.
Ha katei ka jingkhynra, la sakhi ba ki nongdie madan ki khlem pyni bor shuh bad ka jingbteng ia ka jingpynshisha syrnod ka long kaba jai jai. Na ka jingioh lum jingkhein katkum kito kiba la wan ban pyndep ia ka jingpynrung kyrteng (register) ha ka ophis SMB, la don katto katne kiba khlem pat don syrnod bad haba lap ia kane, ki dkhot ka SMB ki la phah lum noh ia ki mar jong kito ki nongdie madan bad bthah ruh ia ki ban pynioh ia ki syrnod kat kumba ka ophis ka la dep ban ai jingmut.
Haba ioh ban kylli na katto katne kiba khlem pat don ia ki syrnod ki la ong ba don shibun kiba la dep ban aplai COV na SMB hynrei ka jingai syrnod ka long kaba pathar bad lehse ka dei ka jingjied briew, ong ki nongdie madan.
Kum ban shu pynkynmaw, u Bah Paul Lyngdoh, Myntri ba khmih ia ka Tnad Tourism bad Bah Sniawbhalang Dhar Myntri ba khmih ia ka tnad pynroi Sor (Urban Affairs) ki la pyntina ba ka Sorkar ka lah beit ban weng ia baroh ki nongdie madan na ka thain 9-Lad hapoh ka 22 tarik mynta u bnai da kaba ong ba kin buh ia ki ha 2 tylli ki jaka ia kiba ka Sorkar ka la dep ban pynshna kyrpang, kata ha Jaka ieng kali (parking lot) jong ka MUDA bad ha ka jaka ieng kali kaba don pyrshah ia ka ophis SBI (main branch, Shillong).
Ban shu bishar katkum ka jinglong ka ïew mynta ha 9-Lad, la i kumba kane ka thong jong ka Sorkar kan ym pat lah ban treikam lashai ka sngi namar ka jingtuid ki nongdie madan ka dang long hi kum mynshwa.
