Ka Mukhla Raij Upper Primary School West Jaiñtia Hills District mynta ka sngi 30 tarik u Risaw, 2024 kala pynhap pyrda ïa ka jingrakhe Jubilee Ksiar ba 50 snem haka jingshakri ban ai jingnang jingstad ïa ki khynnah skul ka thaiñ ha ka jingïalang kaba la pynlong ha Madan Thad.
Ïa kane ka skul la seng naduh u snem 1974 jong u bnai April kaba la ai kyrteng nyngkong ka Mukhla Middle School da ka jingthmu ban ai jingnang jingstad ïa ki khynnah hapoh ka thaiñ Mukhla Dorbar Pyllun kaba kynthup ïa ki san tylli ki shnong bad ha kaba sdang ka skul ki don tang 15 ngut ki khynnah skul bad mynta kila kynjoh duna 700 ngut ki khynnah.
Ha kane ka sngi la ïadonlang naduh u kongsan uba dei ruh u symbud myntri rangbah ka sorkar jylla u ma Snaiwbhalang Dhar, u myntri ka tnad pule pule u Rakkam A. Sangma, u MLA ka thaiñ ma Wailadmiki Shylla, u CEM ka JHADC ma Thombor Shiwat, ki MDC, ki ophisar sorkar, ki nongïalam shnong, ki nonghikai, ki khynnah skul lem bad ki nongshong shnong.
La pynphuh pynphieng shuh shuh ïa kane ka jingdap 50 snem ka skul da ki jingrwai, ki jingshad na ki khynnah skul bad kumjuh na ka shnong kiba la ai ïa ki shad tynrai, la pynkup burom ruh ïa ki member ki nonghikai ba seng ïa kane ka skul bad ïa ki 28 ngut ki khynnah skul ba rim kiba la bat ïa ki kyrdan bapher bapher.
Ha kane ka sngi la pyllait paidbah kymjuh ïa ka Souvenir jong ka skul bad la aiti ruh ïa ka memorandum ban pynpoi sha u Myntri Rangbah halor ki jingdawa ba donkam ban pynïaid shakhmat ïa ka skul naduh ka jingpynkiew kyrdan ïa ka skul, ka building skul, ki rukom ai jinghikai, ka tulop ki nonghikai bad ka jingpynrung skul ïa ki khynnah skul.
U ma Wailadmiki Shylla kum u member jong ka SMC ka skul ula ong kane ka jinglehkmen ka long kum ka dak ban lehburom bad ka jingsngewnguh ïa ki nongseng ïa kane ka skul.Na la liang u kongsan ma Sngawbhalang Dhar ula plie ïa u mawnongrim jong ka skul bad la ot ruh ïa u cake jong ka jingdap 50 snem ka skul.
